Ларгсса бигьалагай кьини Дарбантлив цIуну бувантIисса «Ккавкказуллал Иерусалим» тIисса рувхIанийсса центрданул гьанулул чару бивхьунни шадлугърал тагьарданий. Гьанулуву бивхьунни ялун нанисса никирайнсса лабизаву дусса капсуларттугу. Вай тIитIинтIиссар 2125 шинал. РувхIаний центрданул къатри Дагъусттаннай яла лахъми дикIантIий дур, 88 метра лахъшиврул дусса минарарду бувантIий бур. Мизит бакъагу, бувантIий бур килисагу, синагогагу. Шаннагу дин цачIун дурсса кюру хьунтIий бур.

Ва мероприятиялий гьур­тту хьунни Дагъусттаннал бакIчи Сергей Меликов, ХIукуматрал хъунама Аьбдулмуслим Аьбдулмуслимов, сенатор ва меценат Сулайман Каримов, Аьрасатнал Президентнал Администрациялул каялувчинал хъиривма Владимир Островенко, Республикалул муфти АхIмад-хIажи Аьбдуллаев, Москавуллал муфти Илдар Аляуттинов, Аьрасатнал ягьудинал ккураннал Федерациялул хъунама раввин Берл Лазар, республикалул министртал, къуллугъчитал, жяматийсса ишккаккулт. Бия Аьрабусттаннаясса бусравсса хъамалгу, Аьрасатнавусса Аьрабусттаннал посол МухIаммад АхIмад Аль-Жабер ва Исламрал, закатрал ва вакьпулул хъунмур управлениялул каялувчи Оьмар Хабтур Аль-Дерей хIаласса.
БавтIцири барча буллай, Сергей Меликовлул кIицI лавгунни, цIуну буллалисса центр Дарбант шагьрулул оьрму лавай шаврил, цIа-кьини дюхъаврил ххуллийсса даву душиву.
«РувхIанийсса оьрму хьхьи­чIунмай баврицIун, республикалул экономикалунгу агьамсса давур. Ванил, чIявусса туристътал бакъагу, Дарбантгу, жула республикагу хьхьичIуннай дуллан ччисса инвесторталгу кIункIу буллантIиссар», – увку­нни Меликовлул.

Дарбантливсса центр Абу-Дабиливсса щайх Зайдлул мизитраха лавхьхьусса бикIантIий бур, Дагъусттаннал стилистикалуцIун бакьин бувсса. Ва хъуннасса проектрал авторгу, спонсоргу Сулайман Каримов ур. Ванал барчаллагь баян бунни Аьрабусттаннал ­президент щайх МухIаммад бен ­Зайдлуйн проект бартдигьавриву гьуртту хьунсса пикрилухлу. Ва Абу-Дабиливсса мизитрал проект ишла дуван рязишиву дулаврихлу. «Ккавкказуллал Иерусалимрал» хъунама ­архитектор Ися МахIаммадовлул чIурчIав дунни, центрданул дизайндалуву чара бакъа ишла дувантIишиврий Дарбантуллал аьвзал заманнул архитектуралул элементругу, Дагъусттаннал колоритгу.
Ва буллай байбишинтIиссар «Южный» тIисса цIусса микрорайондалий. Шаннагу диндалул ахIрамру бакъагу, буван тIий бур музейрду, ­библиотека, патир, университет, дахху-ласулул центр, бигьалаглан­сса паркру. Шиккува кIицI лаганна, ттуршра шинава буккинсса, бучIантIимунивунсса чагъарду чивчуминнавух бушиву СВО-лул Аьрасатнал цалчинма Виричу НурмахIаммад ХIажимахIаммадовлул нину Сапижат Мазаева, Аьрасатнал Художествалул академиялул член-корреспондент МахIаммадаьли Аьлиев, «Дагестан» РГВК-лул гендиректор Камила ХIамзатова, Кремлилуву Путиннущал ­хьу­на­­бавкьусса дуклаки душ Раисат Акипова ва цаймигу бусрав­сса инсантал.

ПатIимат Рамазанова