Ларгсса хамискьини даврил аьрххилий Лакрал райондалийн увкIунни шама-шама министр ва «Дагестанавтодор» ГКУ-лул каялувчи.

Укунсса лагрулул десант бучIаврил исват буллай бур райондалухсса къулагъас диялсса душиву.
Аьрххилул лагрулий ххал бивгьунни кIанттун яла агьамми масъалартту – инфраструктуралийн, тIабиаьтрайн ва социал кумаграйн багьайсса. Райондалул бакIчи Зураб Куччаев транспортрал ва ххуллул хозяйствалул министр Жамбулат ХIажиевлущалгу, «Дагестанавтодорданул» каялувчи Рамазан Кьурбановлущалгу Гъумуча Гъунив нанисса ххуллул ялтту буклай буссаксса мутталий, райондалий агьалинащал зий ия кIия министр цаймигу.

Цимигу шинай ялугьлай бивкIссар лахъсса зунттал шяраваллал агьлу Гъумуча Гъунив нанисса ххуллу буллай байбишиннин. Ххуллурдал тагьарданийн хъарсса иш бур транспортрал лага-дучIавринсса бигьашивугу, вивсса туризм хьхьичIуннай шавугу. Кьимат бивщунни объектрай нанисса давурттан. Цува министр ва ххуллурдал ведомствалул каялувчи ялтту буккаврил вихшала дишин буллай бур ххуллу къулагъасралун ласун тIий бушиву ва ккаккан дурсса чIумуйнин къуртал бансса хIарачатрай бушиву. Давуртту анаварсса бущилий къуртал дан бюхъаншиврул багьлай бур Гъуниннал чулухагу дай­ди­­шин.

Муния махъ делегация бивунни ШавкIрату Щарав нанисса ламу ххал бан. Зураб Куччаевлул кIицI лавгунни ва ламу хъинну аякьалийн ласун багьлагьисса объект бушиву, кIира райондалул шяраваллавунсса ххуллу бахIлахIисса бушиврий чIурчIав дуллай.
Жагьилтурал иширттал министр (врио) Камил Саидов хьунаавкьунни кIулшиву дулаврил зузалтращал, жагьилтурал политикалуву бихьлахьисса захIматрахлу ведомствалул чулуха буллунни барчаллагьрал чагъарду, хьунаавкьунни Щардал школалий «Цалчинминнал» суккушиндарал вакилтуращал.

Экологиялул ва тIабиаьтрал сурсатирттал министр (врио)
Ратмир Расуловлул кьамул бунни агьали. Министрнахьхьун буллалисса суаллаву ца яла къулагъас данмур бия ччюрк дичайсса контейнердайн багьайсса – ми паччахIлугърал ласун аьркинссарив ягу жяматрал цала тIисса. Ратмир Расуловлул бувчIин бунни контейнерду ласун бурж бушиву кIанттул администрациялий.
Буллунни суал Гъумучиял Хъуннеххая ххюл ххилан бучIиссарив, ххуллурдайн ягу цайми кIанттурдайн бичин тIиссагу.
Министрнал кIицI лавгунни нехру паччахIлугърал хъус душиву, ихтияр дуллалисса документ бакъа ххюл ласлан къабучIишиву.
Агьамсса ва бусравсса хъамал райондалийн бучIаврил буслай бур, лахъи лавгсса буруккинтту паччахIлугърал къулагъасралу бушиву бакъассагу, кIанттул потенциал чIалай, му хьхьичIунмай бансса проектирдацIун кабакьу буллан хIадурну бушиву.