ЦIуминалийсса Д.Серковлул цIанийсса Шушиннал школалий вай гьантрай хьунни шаэр ХIабибат Магьдиеващалсса хьунабакьаву. КIицI лаган, ХIабибатлул шеърирду хъунмурчIин кIулну бур соцсетирттайхчин ва миву щурущиминнан хъинну бу­сравну бур. Чансса къадикIай миннун лавайсса кьимат бишлашисса отзыврду ва комментариярттугу. Бувкссар ХIабибатлул шеърирду «Илчи» кказитрайгу.

Мероприятие тIитIлай, ХIабибатлул оьрмулия ва творчествалия бувсунни лакку мазрал учительница Умамат Багъирчаевал.
Бувну бур ХIабибат ТIюх­чардал шяраву. Ванил ппу Худайнат ЧIаящату ур, нину СалихIат – Шушиннал шярава. ТIюхчардал школагу къуртал бувну, бувххун бур Дарбантуллал Культпросветучилищалувун.
ХIабибатлун 15 шин хьусса чIумал дунияллия лавгун ур ппу. Му чIумал му Украи­ннай хъунмасса заводрал цехрал хъунаману ивкIун ур. ХIабибат буттан ляличIинува ххирасса бивкIун бур. Шихунай учIансса сант къахъанай, ва ккаккан ччай уну, уссил щарнил бувцуну лавгун бур тихун. Амма буттан ва душнин хьунабакьинсса кьисмат къавхьуну бур. ХIабибат бувкIсса чIумал ванин ппу шава къалявкъуну ур. Даврия тиху-шихунай гьан увхьунссар тIий, учIаннин ялугьлай барзгу бувну, цичIав кIул бангу къавхьуну, шаппай зана хьуну бур. Худайнатлуя ятIа-тIар къабивкIун бур. Махъ баянтIиссар вайннан му аьпалухьхьун лавгсса кьурчIисса хавар. КъюкIлил приступ хьуну, кIичIиравун агьсса Худайнат, цащала документру бакъа, цу уссарив къакIулну, моргравун иян увну ивкIун ур. Му чув ливчIссарив, ци хьуссарив къакIулну личIанссия, жипливу ХIабибатлул шеърирду къалявкъуссания. ЧIапIуй буттал цала каних ХIабибат Дарбантуллал Культпросветучилищалул студентка бушиву чивчуну бивкIун бур. Училищалувун гьан бувну бур Худайнатлул бакIрачIан бувкIмур бусласи­сса чагъар. КIул бакъа балаллул бас дурсса нинугу ца-кIира шинава буттал хъирив ларгун дур. Гьай-гьай, захIматну бивкIун бур жагьилсса душнин нину-ппу чIарав бакъа. ХIабибатлул творчествалуву яла асар хьунми шеърирду мичча нанисса бур.
– Циксса чичларчагу ниттиха, ялагу лякъай чичинмур, – учай цилагу.
Училище бувккуну махъ дуккаврих гъира бусса ХIабибат бувххун бур Москавлив Щалагу союзрал юридический институтравун, амма, ца курс буккайхту, щар хьуну, кьабитан багьну бур институт.
Дуккаврихсса гъирарив къалевщун бур. Бувххун бур Дагъусттаннал университетрал филологиялул факультетрайн. Ва къуртал байхту, ца-кIира шинайсса учительну зийгу бивкIун, яла Машиностроительный заводрай библиотекалул хъунмурну зий бивкIун бур ацIнияхъайсса шиннардий. Шеърирдурив мудангу чичлан бикIайсса бивкIун бур. ХIабибат школалий дуклакисса чIумал ванил шеърирду мудан бищайсса бивкIун бур школалул чIирал кказитрай.
Ми цимилагу бувккун бур райондалул «ЦIуссалакрал колхозник» ва «Заманалул чIу» тIисса кказитирттайгу.
Школалул директор Шакират Шарапуттиновнал, учительтурал, дуклаки оьрчIал дуркку­нни ХIабибатлул назмурду. Хьунабакьаву дакIний личIансса хьунни.

Андриана Аьбдуллаева