Юбиляр барча ан бувкIун бия ванал дустал, даврил уртакьтал, Ваччиял шяраваллил жяматрал вакилтал, Москавлиясса, Ярославль шагьрулиясса хъамал, цинявппагу Илияс Макьсудовичлул творчество ххирами.
Мажлис бачин бувну ия Дагъусттаннал Чичултрал союзрал лакрал секциялул хъунама Супиян Оьмаров.
Шаэр барча уллай, ихтилат бунни Дагъустаннал Чичултрал союзрал каялувчи Марина АхIмадовал.
– Илияс МахIаммадовлуву чIявусса гьунарду буссар. Ванал гьунардайну чIалай бур цуксса буллугъсса дуссарив лакрал аьрщи. Ва ур шаэр, чичу, таржумачи, композитор, художник, ляличIисса чIунил заллу.
Цаппара шинну дурссар жу Дагъусттаннал Чичултрал союзраву архIал зий. Илияс Макьсудович Лакрал секциялул каялувчину уссия. Ва ия аьчухсса, дакI хъинсса, цаманан кумаг бан, чIарав ацIан ччисса инсан. Даврия махъ циняв шаппай анавар буклакисса чIумал, Илияс кабинетраву суратру дихьлай икIайва. Умуд бур та чIумал дирхьусса суратирттал презентация Дагъусттаннал Чичултрал союзрал къатраву данссар ванал тIисса, – увкунни Марина Анатольевнал. Хъирив ванил дурккунни яруссаннал, табасараннал секциярдал чулухасса барча бавуртту.
МахIаммадов Илияс Макьсудович увну ур 1953-ку шинал Ккуллал райондалийсса Ваччиял шяраву. Къуртал бувну бур Дагъусттаннал медициналул институт. Зий ивкIун ур хIакинну. АцIнияхъайсса шиннардий каялувшиву дуллай ивкIун ур Дагъусттаннал Чичултрал союзрал лакрал секциялий. Ванал итабавкьуну бур лакку мазрайсса ва оьрус мазрайсса луттирду. Ва ур Аьрасатнал Чичултрал союзрал член, Дагъусттаннал культуралул лайкь хьусса зузала.
Илияс Макьсудовичлул мукьра номинациялуву лайкь дурну дур Аьрасатнал жяматийсса наградарттал комитетрал чулухасса «За труды в просвещении, культуре, искусстве и литературе» медаль. Мукьрагу номинациялуву ва медаль ларсъсса нажагьсса бухьунссар.
Ванал шеърирду, проза ва публицистика буссар Аьрасатнал поэзиялул антологиялуву.
Хъирив ихтилат бувсса даргиял секциялул хъунама Муса БахIаммадовлул кIицI лавгунни Илияс Макьсудовичлул авадансса творчествалуву ца яла лайкьмур произведенияну хъанахъишиву махъругу, макьангу цала чирчусса гимн. Шаэрнал гимнраву асар хъанай душиву Дагъусттаннал дух, гуж-кьудрат.
– Илияс ур гьунар бусса шаэр-лирик, кьалан байлсса сатирик, ванал бур хъуниминнансса ва мюрщиминнансса поэзия ва проза, чичай лакку мазрайгу, оьрус мазрайгу. ЦIанасса, миллатрал мазру бухлагансса нигьачIаву дусса чIумал, ниттил мазрай чичлачисса шаэр миллатрал мусил фондран ккалли ан бучIиссар, – увкунни Аьрасатнал Чичултрал союзрал Ярославль шагьрулул отделениялул председатель Мамед Халиловлул. Ванал бувккунни шаэрнан хас бувну цала чивчусса шеъри.
– Илияс МахIаммадов искусствалул циняв журардал ва жанрардал лайкь хьусса зузалан ккалли ан бучIир. Жу чIявуну лавгссару творчествалул десант хIисаврай зунттал районнайн командировкардай. Ми аьрххирдай на хъиннува гъанну кIул хьура ванал творчествалущал. Ттун ккавккунни ва цукун хIурматрай кьамул уллай буссарив районнай. Илияс МахIаммадов гьуртту шайссар республикалул, Аьрасатнал самодеятельный художниктурал выставкарттай. Ва лайкьссар республикалийсса цинярдагу искусствалуцIун, творчествалуцIун дархIусса союзирттал членну икIан. Ва ца ухьунссар ххалаххи къабувну, дарув къабуллуну къашайшала хъин айсса хIакин, – увкунни Дагъустаннал лайкь хьусса художник Амирхан МахIаммадовлул.
ТIюхчардал школалул директор ЩайхахIмад Дадаевлул бувсунни Илияс Макьсудович ТIюхчардал школалул чIа тIисса хъамаличу ушиву, ва цала школалий дуллалисса чIярусса мероприятиярттай гьуртту шайшиву, оьрчIангу, учительтурал коллективрангу ххирашиву. Бувсунни ванал ссу ТIюхчардал школалий зий бивкIшиву ва мунил цахьра дарс дирхьушиву.
Дагъусттаннал Культуралул министерствалул ва цала чулуха шаэр барча унни Лакрал театрданул директор МахIаммад ХIусайновлул, «Солидарность и свобода» тIисса жяматийсса организациялул чулуха председательнал хъиривчу, хасъсса аьралий операция нанисса кIанттурдайн цимилагу гуманитар кумагращал лавгсса Садаят МахIаммадовал, одноклассниктурал чулуха Ися Зайдиевичлул, мукунма юбиляр барча уллалисса ихтилатру бунни Гьарун Саэдовлул цIанийсса жяматийсса организациялул ва Ваччиял жяматрал вакилтурал.
Ихтилатирттал лях-лях Илияс МахIамадов ккалай ия цала чивчусса шеърирду, тIий ия балайрду.КIицI лаган, юбилейрал мажлисрай увкусса цинявппагу балайрдал махъругу, макьаннугу Илияслул чирчусса дия. Ванал мукъурттийсса балайрду увкунни Загьидат Муслимовал, Жанна Кьурбановал, Михаил ХIашимовлул, Шарапи Ажубовлул, МахIаммад Аьлиевлул.
Шеърирду бувккунни республикалул шеърирдал конкурсирдай ххув хьусса дуклаки оьрчI Сяид Кьурбановлул.
Ахирданий Илияс Макьсудовичлул барчаллагь увкунни цала кьини хъун дан бувкIсса цинявннахь ва щаллу дунни цала чирчусса гимн.
Мероприятие сакин дурну дия Лакрал театрданул ва Дагъусттаннал Чичултрал Союзрал.
Андриана Аьбдуллаева
