Уттигъанну на Ваччату Къянив нанисса машиналий шавайн най уссияв. ЧIяйннал шяраваллил лултту чулийсса ца дарвазалул хьхьичI бавцIуна машина, га дарвазалул хьхьичIсса кIия жагьилнахьхьун, ссалам булун.

Нагу, туну, га ца жагьил, Аьбдуллаев Салман, ттунагу кIулсса уну, чIавахьулттийхва яхши-хаш бувссия. Гай жагьилтал цивппагу царай чарттаха лархьхьу­сса, ранг кIул дан къахъана­хъисса затру бургирдах гъагълай бия. Суал булайхту, бувсуна Гималай зунттурдая бувкIсса цIу гъагълай бушиву. Ттун га иш махIаттал бивзуна. Гималай зунттурду жунма кIуллихха Индиянал ва Пакисттаннал аьрщарай бушиву. Индия, Пакисттан чув бур, ЧIяйннал шяравалу чув дур!

МахIатталшиву иширал. Нагу ца парча цIил ттухьхьунгу булара куссия.
Шавай увкIун, ттула луттирду ххилтIу буллан ивкIукун, ттуща кIул буван хьуна укунсса зат. Вай цIийн учайсса бур «Гималайнал марцIну пар-пар тIисса, шагьрал рангирал цIу» куну. Цивппагу Гималай зунттаву хIасул хьуну бур 250 миллион шиннардил хьхьичI.

Та чIумал та кIанттаву бивкIсса океан, кIиришиврул щарай, цIил зунттурдайн кIура бавну бур. ЦIу хIисав байсса бур хъинну марцIссаннун. Циван учирча, Пакисттаннай бакъа­сса бур тIабиаьт зия дайсса заводру. ЦIу биххайсса бур каруннах, цукунчIав п1якь учайсса затру ишла къадурну. ЦIу кьакьан байсса бур бургъилу.
Цалсса аьлимтал жаваб дуллай бакъар вай цIу, инсаннан заралсса бакъашиву бусаврищал, дарув-дарманнугу хъанахъиссарив, къахъанахъиссарив.
Оьруснал миллатрал учала бур: «Дунияллий 100 шинай яхъа­най ухьурчагу, затру кIул буллан, лахьлан къачIалссар», – тIисса.