Ттул ихтилат, райондалул­ му­зейгу сакин бувну, музейрал экспонатру, тарихру батIлай хIарачат бувсса лаккучу, ЦIийшиял шяравасса шаэр, тарихчи, журналист МахIаммадлул арс ХIажимурад ХIажиевлуяр.

Ва увссар 1933 шинал, машгьурсса аьлимчу, аьрабист, тарикьатрал щайх, ЦIийшиял ХIажимурадлул тухумрайхсса МухIаммад Мяъсумлул кулпатраву. МухIаммад Мяъсум 30-ку шиннардий, репрессиярттал чIумал, гьан увну ивкIссар захIматрал фронтрайн. Тикку зий унува захIматну къашавай хьуссар. Ппу аьпалул хьусса чIумал ХIажимурадлун диркIссар дурагу 7 шин. Вагу, ванал ссу ПатIиматгу хъуни бувссар ниттил Хамислул.Ккуллал райондалул музейраву

Школа къуртал бувну махъ ХIажимурад лавгссар аьралуннаву къуллугъ буван. ЧIивину усса чIумала ХIажимурадлуйн тамансса асар биян бувссар халкьуннал бусалардал, назмурдал, лувлякъурттал. Ванал цалчинсса цала шеъри «Щунул хажалат» чивчуссар школалий дуклакисса чIумалва. Армиялия зана хьуну мукьах ХIажимурад зий ивкIссар Ростовуллал областьрай. 1958 шинал зун ивкIссар Ккуллал райондалул аэропортрал радиооператорну,1959 шинал ивтссар аэропортрал хъунаману. Ва къуллугърай зий ивкIссар 22 шинал мутталий.

Та чIумал ЧIяв азарханагу бивкIссар, захIматсса къашайшала ухьурча, ХIажимурадлул санавиация тIалав дайсса диркIссар. Ванащал цачIу зий ивкIссар ЧIятусса Даудов КьурбанмахIаммадгу. Вайннал тамансса къуллугъ бувссар райондалул агьалинаха. ХIажимурадлул даврин лайкьсса кьимат бивщуссар «Авиалинии Дагестана» идаралул, ванан дуллуссар хIурматрал грамотартту, барчаллагьрал чагъарду. Халкьуннаву ванайн учайсса бивкIссар «Самолет-ХIажи».
1982 шинал ХIажимурад зун ивкIссар МахIачкъалаливсса Дагпромстройрай. 1994 шинал кьамул увссар «Илчи» кказитрал редакциялийн корреспондентну.

 

ХIажимурадлул чичайссия хъунмурчIин диндалул ва тарихрал макьалартту. Имам Шамиллул фондрал ванан дуллуссар Шамиллул цIанийсса медаль – Шамиллул оьрмулия чирчусса макьаларттахлу.
2003 шинал Ккуллал райондалул бакIчину ивкIсса ХIадис МахIаммадовлул ХIажимурад ивтссар райондалий цIуну тIив­тIусса музейрал директорну. Ванал хъунмасса захIмат бувссар музей аьркинсса экспонатирттал щаллу буван. Та чIумалсса Дагъусттаннал Тахо-Годил цIанийсса музейрал, ХIажимурадлул дурсса даврин кьиматгу бивщуну, райондалул музей лахъан бувссар Дагъусттаннал музейрдал даражалийн.

2009 шинал ХIажимурад ХIажиев, захIматсса азарданул къашавай хьуну, дунияллия лавгссар. Цал бунагьирттал аьпа баннав.
МахIмуд Аьлилов