Ларгсса бигьалагай кьини МахIачкъалалив, «Апрель» ресторандалуву, СВО-лул Аьрасатнал цалчинма Виричу, республикалул хъуншагьрулул 54-мур школалул директор, Дагъусттаннал лайкь хьусса учитель Сапижат Мазаеващал хьунабавкьунни лакрал интеллигенция, министерстварттал ва паччахIлугърал структурардал вакилтал, районнал хъуними, депутатътал, жяматийсса ишккаккулт, творчествалул идарарттал ва фондирттал каялувчитал, школардал директортал, вузирдал преподавательтал.

Сапижат Мазаевал «Единая Россия» партиялул чулуха цIа рирщуссар ПаччахIлугърал Думалувун, ванил карточка дуссар уттива чIурду булун бучIисса сайтрай ( предварительное голосование).
Официал бувчIавуртту хьун­тIиссар сентябрьданий. Кандидатътурал цIарду дусса сияхIрал бази дувантIиссар партиялул съездрай. КIицI ларгсса хьунабакьавугу Госдумалул бувчIавурттан хас дурсса дия.

Мероприятие дачин дурсса Шалласу Шалласуевлул кIицI лавгунни ПаччахIлугърал Думалувун цIа рирщусса цалчинсса дагъусттан душ хъанай бушиву Сапижат Мазаева. «Лакрал тарихраву абадлий лиххан дан къашайсса цIа кьариртссар НурмахIаммадлул. Уттинин Аьра­сатнал тарихраву цаягу императорнал, паччахIнал, хъунаманал, Владимир Путиннул кунма, «на лаккучура» къаувкуссар. Гьамин, НурмахIаммадлул чувшиврулли билаятрал президент укун учин увссагу. Ватандалул мурадирттал цIаний жан кьурван дурсса арснал чувшиврун лайкьну къуццу тIий бур Сапижат, арснацIа хьусса кьурчIишивугу яхIлий дурхIуну, Ватандалуха къуллугъ буллан ччай бур, цуппа кунмасса ниттихъал щавурдай ка дихьлай, агьалинал буруккинтту ва цIуцIикIантту аьч буллай зий бур», – увкунни ванал.
Республикалул Жяматийсса палаталул хъунаманал хъиривчу Ссапарбаг Аьбдуллаевлулгу кIицI лавгунни Сапижат Мазаева укунмагу зий бушиву, вания тихунмайгу мюнпатранну зуншиврий дакI дарцIуну ушиву, Дагъусттан гьаз бувансса давуртту дуллай.
Хьунабакьаврий гьуртту хьунни лакрал шаннагу районнал хъуними: Зураб Куччаев, Ажуб ХIусманов ва МаматIи ХIамзатов. Вайнналгу кутIасса ихтилатирттаву кIицI лавгунни цащава шаймур бувантIишиву хьхьичI бивхьусса масъалартту багьайсса даражалий бартбигьин.
ЧIярусса шиннардий Лакрал райондалул бакIчину зий ивкIсса Юсуп МахIаммадовлулгу кIицI лавгунни, гьарца чулуха хIисавравун лавсун, Сапижат Мазаева лакран ца яла аьркинмур инсан бушиву, ванил республикалул ва федерал даражалий сантирай ва лябуккулий зунсса потенциал бушиву.
«Ва так лакрал тарихраву бакъагу, чIяву миллатру бусса щала Дагъусттаннал тарихравугу агьамсса ишри. Ца кулпат кунма, жува Сапижат Исяевнал лагма лавгун, ванихлу чIурду булаву агьамшиву дусса давур. Ва лайкьсса инсан, лайкьсса нину, республикалул ва щала билаятрал лайкьсса вакил бугу-бунутIий», – увкунни республикалул культуралул министрнал кIанттайсса Зарема Буттаевал.
Парламентрал депутат Артур Исрапиловлул кIицI лавгунни Сапижат, Дагъусттаннай бакъагу, чIярусса цаймигу регионнайгу агьалинащал хьунабакьлай, СВО-лий арсру, ласру, ппухълу ливтIуминнал къайгъурдалсса буллалисса инсан бушиву.
Балжину бувсунни ванал чIурду булаврил низамрая, инструкциялия, компьютерданул даврил мухIлу-хIин къакIулнан цахъис захIматсса даву душиву, кIулминнан цичIав захIмат хьунсса иш чIалай бакъашиву.

Бувсунни «Госуслуги» порталданий регистрация дусса гьарманаща чIу булун бюхъантIишиву.
Депутат Марат Илиясовлулгу кIицI лавгунни, Сапижат Мазаеван хIакьну кумаг буваншиврул гьарца кулпат, тухум, шяраваллил агьлу, даврил ва пикрилул уртакьтал гьуртту хьун аьркиншиву чIу булавриву. Ванал маслихIат бунни ва давриха зунсса, ялувбацIаву дувансса Координациялул центр хIисаврайсса инсантал личIи буван, уттизаманнул технологияртту, компьютерданул даву ва бияла ххуйну кIулсса.
«НурмахIаммад кунасса арс тарбия увсса хъамитайпа лайкьссар ПаччахIлугърал Думалул депутатну бикIан. БувчIирча, Сапижатлул сантирай ва бюхъулий арснал даву гихуннай дачин дувантIиссар. Ватандалийн дакI тIайлану къуллугъ буллай, СВО-лул гьурттучитуран ва вайннал кулпатирттан къулайсса давурттал сиптачи ва сакиншинначину, мукунма образованиялул даврил вивсса цинярда нюансру куртIну кIулсса Сапижатлул ва даврихгу диялсса къулагъас дикIантIиссар. Образование – жула билаятрал бучIантIимурди», – увкунни Мариян Илиясовал цIанийсса «Дараччи» фондрал хъунмур Гульшан Хасаевал.
ДГТУ-лул профессор, чичу, публицист Нажават Абуевалгу кIицI лавгунни, цуппа Сапижатлущал кIул хьуния шинмай, ванил цила дакIниву ххуйчулинмайсса асарду кьабивтшиву.

Гьамин кIулшивуртту дулаврил даву сантирай ва лябуккулий ххуй дувансса чаранну лякъин аьркиншиврия, ми масъалартту, цIуцIи кIантту ва буруккин­тту федерал даражалий бартбигьлансса вакил аьркиншиврия бия школардал директортурал ихтилатругу.
11-мур лицейрал директор Зухра Дибировал кIицI лавгунни, учитель ва директор хIисаврай Сапижат Мазаева уттинингу педагогнал даврий сий гьаз давриха, оьрчIал кIулшивуртту ва тарбиялул даву хьхьичIуннай давриха зузисса инсан бушиву, утт­и­­гу мюнпатсса идеяртту бартдигьланссар тIисса ният душиву. Вава мяъна-мурадрайсса ихтилатру бунни ванил уртакьтурал: 28-мур гимназиялул директор Гульнара Аьбдуллаевал, 41-мур школалул директор Зульфия Сайпуллаевал, 36-мур школалул директор Ульяна Касаевал.

Сайпуллагь Аьбдуразакьовлул ва цаймигу гихунмай ихтилатру бувцириннал кIицI лавгунни Сапижат Лакку кIанугу ххирасса, лакку мазрах, культуралух ччаву дусса, аьдатир­ттал хIурмат бусса патриотгу бушиву.
Ахирданий Сапижат Мазаевал барчаллагь увкунни хьунабакьаврил сиптачитурахь, сакиншинначитурахь ва гьуртту хьуцириннахь.
«На зий буссияв «Дагснабрай» техничкану ва байбихьулул классирттахь дарсру дихьлахьисса учительницану. Хъихъи лавсъсса оьрму бакъая тачIавгу, амма нагу, на кунмасса циняв ниттихъалгу язи бугьай ххуллий чара бакъа язи бугьантIиссия мукьра шинал хьхьичIсса, арсру сагъсса оьрму. Дунияллул хъу­с-ххазинарду жула цачIу-чIарав бусса, талихIрайсса оьрму. Агьалинащал хьунабакьлай, ттущара цукунсса-дунугу мюнпатсса давуртту дуван хъанахъиний, ттун ттула оьрмулул мяъна мукунсса давурттаву чIалан диркIунни. Жул арсурваврал жанну кьурван дурссагу Аьрасатнал билаятрал агьалинан рахIатсса оьрму дузал буллайри, ва билаятрал оьр­му хьхьичIунмай хъит учавур – жул аьмсса мурад. Мунияту ттуйнна вихшала душиву чIалай, бакIрайнласу бував, ттуява хайр-мюнпат бикIанссар тIисса ниятрай, шаймургу буллантIиссара», – увкунни Сапижатлул.

Бусан ливчIунни ва ххуйсса даврил сиптачи ва сакинншинначи ушиву жула лакрал лайкьсса арс, Ккурккуллал шяравасса сахаватлув, меценат Сайпуллагь Аьбдуразакьов.
Сапижат Мазаевал чIа­рав бацIан ччиминнаща бюхъантIиссар хIакьинува чIу булун хIадур хъанан, регистрация дуваврия дайдихьу дуван. Гьаннайсса, Аьрасатнал гьарца гражданиннаща хьунтIиссар чIу булун. Аьрасатнал ЦИК-рал информациялийн бувну, чIу булун аьркинссар укун. Буххияра «pg.er.ru» сайтрайн. Лякъияра «Хочу проголосовать» тIисса пункт. «ГосуслугилийхчIинсса» вход язи бугьира, зула профильданул цIа, фамилия ишла дувансса ихтияр дулара, СМС-калий бувкIсса кодрайну. Яла зула регистрациялул адрес ххал дувара, системалул зу цIакь бувантIиссару аьркинсса участокрацIун. Майрал 25-нния 31-ннийн бия­ннин зул личный кабинетравун бучIантIиссар бюллетень. Язи угьира кандидат – булара чIу. Официал бувчIавурттайн уттигу зана бикIанну, бусанну цукун чIу булун аьркинссарив августрай.

ПатIимат Рамазанова