[dropcap]М[/dropcap]ахIачкъалаллал аэропортрай ноябрь зуруй «Азимут» авиакомпаниялул тIитIлай дур Ростоврая МахIачкъалалив ва Краснодардайнсса рейсру. ЦIуну тIитIлатIисса рейсирдая бусан «Дагестан» РИА-лул редакциялий журналистуращал хьунаавкьунни «Азимут» авиакомпаниялул директор Эдуард Теплицкий.

Имара Саидова
[dropcap]В[/dropcap]анал бувсунни рейсру дуллан­тIишиву Sukhoi Superjet 100 модификациялул цIусса самолетирттай. Ва рейсрайнсса яла лагьмур багьа промо-тарифрайн бувну 888 къуруш хъанай бур. Мунивун духлахи­ссар пассажирнал ларсун нани­сса 10 кг. кIушиврул дусса кьай-кьуйгу.
«Азимут» авиакомпаниялул тIайланнасса рейсру дуллантIиссар Аьрасатнал цаймигу субъектирдайн. 2017 шинал август зуруй ва авиакомпаниялун дуллуну дур па­ссажиртал ххилан ихтияр дусса сертификат. ЦIанасса чIумал компаниялул база бур Ростов шагьрулул аэропортрай. Декабрь зуруй «Азимут» авиакомпания дизантIиссар «Платов» тIисса Ростоврал областьрал центрданийсса аэропортрайн. Авиапредприятиялун кумагран­сса аэропортну хъанахъиссар Краснодардал аэропорт. Пикрилий бур Краснодардал аэропортрай «Азимут» авиакомпаниялул филиал тIитIин. Авиакомпаниялул сияхIрай дур Sukhoi Superjet 100 модификациялул 4 самолет. 2022 шинайн бияннин авиакомпаниялул самолетирттал базалул сияхIрай дикIан най дур 16 самолет.
Эдуард Теплицкийл бувсунни, сентябрь зурул 21-нния байбивхьуну, авиакомпаниялул 10 азарахъул пассажиртал биян бувшиву ва 2018 шинал 800 азара пассажир ххилан­сса пикрилий бушиву.
МахIачкъалаллал аэропорт­рал директор Арсен ПирмахIам­мадовлул бувсунни цIуну тIитI­латIисса рейсру авиапредприятиялул хьхьичI бивхьусса агьам­сса масъаларттавасса ца хъана­хъишиву.
— Жу хIарачат буллай буру Да­гъусттаннал авиапредприятиялущал зун ччисса авиакомпаниярттансса ххуллурду тIитIин. ХIакьинусса кьини МахIачкъалаллал аэропортрая Москавлив, Санкт-Петербурглив ва чил билаятирттайн пассажиртал ххилаххисса 10-хъул авиакомпанияртту дуссар. «Азимут» авиакомпаниялул самолетирттал база Ростов шагьрулий бушивриягу пассажиртуран хъуннасса къулайшинна дур. Экономикалул тагьар захIматсса ппурттуву цIусса авиакомпания сакин давугу хъуннасса даврин ккаллиссар, — увкунни Арсен ПирмахIаммадовлул.
Авиакомпаниялул вакилтурал кIицI лавгунни компания тIитIаврин савав хьушиву махъсса ппурттуву цIуллу-сагъшиврул масъаларттал ялув Ростоврайн заназисса инсантал гьарза шаву.
А. ПирмахIаммадовлул мукунма бувсунни МахIачкъалаллал авиапредприятиялун цIуну тIитIин пикрилийсса маршрутирттаягу. Ванал бусаврийн бувну, пикрилий бур ЦIусса Уренгойрайн ва Тюменнайнсса рейсру тIитIин ва кьутIирду дуллай бур Къазаннайн ва Екатеринбурграйсса рейсирдал хIакъиравугу.