![](https://ilchi.info/wp-content/uploads/2020/06/salikh-300x300.jpg)
2-мур дачIи шинайнсса «Илчилул»
подписка къуртал хьун 2 нюжмар лирчIссар.
Жула лакку кказитрацIун бавхIусса мурадру тачIаввагу чансса бакъар.
Ми мурадирттавасса ца яла агьаммурну ва итталу битан аьркинмурну бикIай кказитрал подпискалуцIун бавхIусса мурад. Му сукку бан багьай шинай кIийлва.
Гихава най бунува жун чIалан бивкIунни гьашинусса кIилчинмур дачIи шинайнсса подпискалул масъала ххишаласса захIматшиврухун багьан най бушиву, хIакьину инсантурал дакIурдиву хIасул хьусса тагьар цайми чIуннардиха хъинну къалархьхьусса дуну тIий, инсантурал буруккинттугу, къайгъурдугу ялун дирсса бала-апатIсса азарданул ясир бувну буну тIий, цамунил пикри бансса мажалгу, хIалгу чIиви личIан бувну буну тIий. Мунийн бувну, «Илчилул» редакциялул цIанияту жу лабивзссияв жула махъ бияйсса гьалмахтурайн, лакрал вакилтурайн, патриотътурайн, ва ххуллух цал ххишала чIарав бацIияра тIий.
Нава телефондалувух оьвкуну шамилчинмур кьини «Илчилул» редакциялийн увкIунни МахIачкъалаллал Кировский райондалул каялувчи СалихI Сагидовлул тIайла увксса кумагчи 100 «Илчи» кказит чичинсса кашилущал, ми чичинсса кIанттурдал адресругу архIалну.
Камаллул арс СалихI Сагидов жун ттинингу къакIулсса, къахьунабавкьусса инсан акъая. Мукун бунугу, жу ванал цал уттигу тIааьнну хIайран бувунну – цала чувшиврулгу, чумартшиврулгу даражалийну, хIакьсса патриотшиву ссаву дуссарив бувчIусса, кIулсса чув ушиврийн бувну.
Патриотшиву – му хъазамравух заккантту бишлашаву дакъар, му хьхьичIра-хьхьичI иширайнусса мурадру бартбигьлагьавур – миллатрал хIакьинусса кьинилулгу, гьунттийсса ялун бучIантIимунилгу пикри куртIну дакIнивухгу, бакIравухгу итабакьлакьавур.
Шиккува ххи бан ччай ура, «Илчилийнгу», лакрал миллатрайнгу багьайсса цайми-цаймигу агьамсса масъаларттал чIарав бацIайсса вакилтал ялагу биялсса буссар жула. Миннаясса чIявуминнал цIарду, гьарца шинах тIиссакссагу, кIицI дурну дикIайссар «Илчилул» барчаллагьрал лажиндарай.
Амма ва ххуллух СалихIлул бувмур жун ххишала бакъа бусрав хьунни, бювххунни.
Руслан Башаев