Сентябрьданул 8-нний «Дагестанская правда» кказитрал редакциялий хьунни Дагъусттаннал Росгвардиялул управлениялул хъунаманал хъиривчу – лицензияртту ва ихтиярду дулайсса центрданул хъунама полициялул полковник Навруз ХIусайновлущалсса пресс-конференция. Шикку гьуртту хьунни Росгвардиялул управлениялул хъунаманал кумагчи, полициялул полковник Константин Шиянгу.
Ихтилат хьунни ярагъуннил хIакъиравусса Федерал закондалуву (№231) хьусса дахханашивурттая.
Дурсса дахханашивурттайн бувну авчинал ттупанча ва цаймигу журалул битайсса ярагъ ласун бюхълай бур так 21 шинавун бивсса инсантураща. Уттинин ми ласун бюхъайссия 18 шин хьусса инсантураща. Закондалул къадагъа дуллай бур СМИ-дай ва Интернетраву ярагъ бансса ягу му цамур журалийн кIура баен бансса куц буслан, лахьхьин буллан.
ТанмихIрайн кIункIу бувсса ягу хIарчIун рульданух щябивкIун тIий жавабрайн бувцусса инсантуран ярагъ ласунсса лицензия дулавриву ссуссукьушиву хьуну дур.
КIусса тахсиркаршивуртту дурну танмихIрайн кIункIу бувсса, мукунма ярагъ ишла бувсса тахсиркаршивуртту дурминнан ярагъ булун къадагъа дирхьуну дур. Мукунна ярагъ булун къадагъа дирхьуну дур ярагъ ишакаш бувсса тахсиркаршиврухлу, терроризмалул ва экстремизмалул журалул тахсиркаршиврухлу танмихIрайн кIункIу бувсса инсантуран. Закондалийн бувну агана залунначIату ярагъ бакъа хьуну ягу бавцуну бухьурча, мунал баян бан аьркинссар Росгвардиялул управлениялийн.
Ярагъ ласунсса лицензияртту ва ихтиярду зеххинтIиссар, агана ярагъуннил залуннал му ябуллалисса кIанттурду ягу цуппа ярагъ ххал бан увкIсса Росгвардиялул зузалан ккаккан къабарча.
Газрал ярагъуннил заллухъру, мукунма цала цивппа буруччаву мурадрай битай ярагъ лавсъсса инсантал 5 шинай цал ххал байсса бивкIссар ярагъуннищал занакьулу бикIан кIулну бурив ккаккан. Мукун ххал бувну махъ ялагу ярагъ ласунсса ихтияр дулайсса диркIссар. Уттинин ми ххалбигьавурттая мурахас байсса бивкIхьурча паччахIлугърал аьрали идарарттай къуллугъ буллалими, аьрали званияртту ва юстициялул чинну думи, утти закондалуву дурсса дахханашивурттайн бувну, мурахас буллалиссар гужирдал структурардаву къуллугъ буллай бивкIун, пенсиялийн бувкмигу. Вайннан аьркинссар Росгвардиялийн къуллугърал стажрал хIакъиравусса документ ва пенсиялул удостоверение биян бан.
Кьянкьа дурну дур граждан ярагъ ишакаш баврил хIакъиравусса законгу. Ярагъ ишакаш баврил ялув ацIаву дуллалисса Росгвардиялул зузалайн мютIи акъа ухьурча, 5000-нния 10000-ннийн дияннинсса аьчIа дишайссар, зеххайссар ярагъ ва патронну ягу ца-кIира шинайсса ярагъуннинсса ихтияр.
Ккулла-янсав ябаврил тIалавшиннарду дурурччуну дакъахьурча 500 къурушрая 2000 къурушрайн дияннинсса аьчIа дишайссар. Агана ярагъ митинграйн ласурча 3000-нния 5000-ннийн дияннинсса аьчIа дишайссар. Ярагъгу зеххайссар.Ца шиная шанна шинайн бияннин му ласунсса ихтияргу зеххайссар. Агана лицензиялул чIун дурккун, цIусса ларсун дакъахьурча, ярагъуннил залуннай аьчIа дишайссар ягу дачIи шиная ца шинайн бияннин ярагъуннийнсса ихтияр зеххайссар.
Вай дахханашивуртту дурсса закон зунтIиссар так ца шинава.
Навруз ХIусайновлул мукунма бувсунни цIанасса чIумал Росгвардиялул управлениялул лицензияртту ва ихтиярду дулайсса подразделениярттал сияхIрай 90 азаруннийн бивсса инсантал бушиву. МинначIа 120 азарунния ливчусса граждан ярагъ бушиву.
Ихтилат къуртал хьуну махъ Навруз ХIусайновлул ва Константин Шияннул журналистътурал суаллахьхьун жавабру дуллунни.