Таврдайсса ва кIарттайсса чичрурду

***
Ци кIанттайн оьрмулул ина увтнугу,
Вищал дикIантIиссар ттул гъилишиву.

***
Буттал къатлувусса ужагърах куна,
ЧувчIаввагу гъили къалагантIиссар.

***
ДакIнийн бичинтIиссар бухсса балайрду
Ина ва цIарах.
ВичIан бучIантIиссар цIусса балайрду
Вара цIарахун.

***
Буттал шяравунай зана ивкIукун,
ВярчIухсса пуркIугу ссайгъат ххантIиссар.

Аьнди варсайсса чичрурду

***
Симинияр кIукIлусса варсул чурчив бунугу,
Чаннаннил дакIру дусса вирттаврал къатта хьуссар.

***
Къучагънал ва аькьилнал хъачIунттай бавкьуссара,
Бурганнуча бакьайрив утти вилми хъачIунттай.

***
Зун къатта къагьарив хъун лухIи варси?
Ччаву хьусса кIиннан варсигу къаттар.

***
Варсулу ссур банссар виричунал чу,
Ччарча ссапарданий, ччарча дяъвилий.
Варсуй зана хьунссар шавай виричу,
Я ялтту ливчуну, я кай-кай увну.

***
Замгьар буккарчагу, зюви хьурчагу,
Вин магъи ва шанур лухIисса варси.

***
Варси лухIинугу, лухIи дакI дума
Гъили къаантIиссар, дакI марцIма акъа.

КIялазурттайсса чичрурду

***
Уттавама, ина винма ччимур ба,
Уттавама, ина ччан бивкIмур уча,
Хъамамабитара, нажагь бунугу,
Ттул гьаттацI бивщусса чарихгу урган.

***
Шиву шанашима жагьилсса ивкIссар.
Ванан ккавкмур, кIулмур жунма къакIулссар.
Так ца зат мяйжанссар: ва инсан ивкIссар,
Ниттил увни, аьтIий, ивчIайни, — угь тIий.

***
Къучагъ ивкIссар талай бавккумунищал,
Бавккумур ттигу бур, къучагъма чув ур?

***
Гьай, кIакIаш! Виричу ивкIунни куну,
Ина ххаришиву ца хъис мадара!
Виричунал цала ттупанг ва ххаржан
Шийрарча кьадиртсса, гивун къаларсна.

***
Цукунсса барчагу жува ххуллурду,
Ахир цара ца дур – циняв шивун бур.

Ххаржантрайсса чичрурду

***
Вана ттул кIяла кьуру –
Дуснал кIунттиву бугьан.
МицI ва дайлсса зумарду –
Душманнал хъазамравун.

***
Цила къатлув кунна ххаржан къадакьай,
Ява, кIулну икIу, ххаржан ласуннин!

***
Ххаржан дугьан ччарча, дус, кIулну икIу,
Каруннияргу хьхьичI бакI аьркиншиву.

***
Вил канихьсса ххаржан къюкIссар, мурчIиссар.
ТIайла къадацIарчан, аьтIутIу, уссу!

***
Къаччан бикIавугу оьттуй шюршунни,
Кьюкьалашиннагу оьттуй шюршунни,

***
Аммаки уттинин ххаржандалийсса
Оь шювшуну щилчIав марцI къабувунни.

***
Хъа байни, ттул кьуру кIунттил булугьи,
Хъамур зумардайсса дайлшиврийн бува.

***
Ттул кьурттарайн хъап чиннин,
Ца лахIзалий ссавур да!

***
Ттул ццахханнушиву ва оьккишиву –
Щалларагу мури – хъярч къакIулшивур.

Таржума бувссар Ю. Хаппалаевлул