Дагъусттаннал премьер-министр Аьбдулмуслим Аьбдулмуслимов Луганскалий ушиву баян бунни республикалул ХIукуматрал пресс- службалул. Ва гуманитар кумаг биян буван ва СВО-лий гьуртту хъанахъисса дагъусттанлувтуращал хьунаакьинсса мурадрай лавгун ур.
Аьралитурал дакIру хьунмур бувансса культуралул программагу душиву, премьер-министрнащал тихун республикалул машгьурсса артистътал ва ансамбльлугу лавгшивугу кIицI лаглай бур. Ноябрьданул 13-нний ХIукуматрал делегациялущал архIал ванал тIутIив дирхьуну дур гьашину февральданул ахирданий жанну кьурван дурсса 12-мур батальондалул вирттаврал аьпалунсса мемориалдануцI.
КIанттул агьалинал бувсмунийн бувну, мемориал дацIан дурсса кIаная байбивхьуну бур Аьрасатнал аьралитурал Луганск тархъан буваву. Ва мемориалданий Аьрасатнал, Луганскаллал ва Дагъусттаннал ттугъру бивщуну бур, чарий дур укунсса чичру: «Вайннал бавцIунува жанну дуллуссар, агьали никирттайн багьну къаяхъананшиврул».
ПатIимат Рамазанова
