Ккуллал школалул музей хIасул бувну бур тарихрал дарсирал учитель МахIмудов Адамлул. Адамлул музейравун цачIун дурну дия Ккуллал шяраваллил тарихращал дархIусса дакъагу, щалагу лакрал миллатрал тарихрая бусласисса экпонатру.
Бунияла уттисса инсантурал къатрава хъинну чан хьуну дур жула лавгмур оьрмулия бусласисса кьай-кьуй. Мунияту Адамлул дуллалисса ва даву кьимат бищун къашайсса душаврин ккалли дан багьлай бур. Шивусса циняв эспонатирттая буслай щаллусса лу чичин хьунссия.
Шиву дур «зернотерка» тIисса жунна кIулсса каний нигьирттаяр хьхьичIра диркIсса хъувухъу байсса чария дурсса экспонат. Ва Адамлул бусаврийн бувну цала музейравусса яла архмур чIумуясса экспонат душиву буслай ия.
Ва жула замана байбишиннинсса дусса дия. Къалайчинал къатлувусса пурщ, личIи-личIисса къатта-къушливу ишла дуллай диркIсса тIаннул тIабакьру, хъу гъай чайни ишла дайсса махру, биллу, оьрчIал кIану, 1930-ку шиннардий ита бавкьусса лакку мазрал ва арифметикалул луттирду, СССР-данул чIумалсса арцу, авлий лавгний ишла байсса ярагъ.
Адамлул дирхьуну дур лавгзаманнулми экспонатру дакъассагу, уттизаманнул тарихраву цIарду кьадиртсса, чиваркIуннал оьрмурдащал дархIусса экспонатругу. Барчаллагь вин хъунмасса, Адам!
