Кьурбан байрандалун хас дурсса шадлугъру кIицI ларгунни Ккуллал райондалул щархъай. Зунттурду, арду уртту-тIутIавун дахьларгсса ппурттуву, Ккуллал шяраваллия арх бакъасса Ялтту-Ар тIисса майданнив хьунни Ккуллал райондалул жяматрал оьрмулуву агьамсса кIану бувгьусса ХIасан Рамазановлул аьпалун хас дурсса Спортрал турнир. Шикку гьуртту хьунни райондалул каялувчитал, машгьурсса спортсментал ва мачча-гъанми.

Ва кьини бусравсса хъамаллуравух бия ДР-лул экономикалул министр ХIажи Султанов, Ростехнадзорданул каялувчинал хъиривчу Артур Амуттинов, Дагъусттаннал шяраваллил хозяйствалул министрнал хъиривчу Зураб Куччаев, Дагъусттаннал аьрщарал иширттал министрнал хъиривчу Эмил Ттаттаев, жяматийсса ишккакку АьвдурахIман Адамов, Ахъушиял райондалул администрациялул хъунама АхIмад МахIарамов, Ккуллал СПК-лул председатель Чупан Кьурбанов, захIматрал ветеран МахIмуд Аьлилов, Ккуллал райондалул имам Маннар Бариев.

Мажлис бачин бувну ия Дагъусттаннал Чичултрал союзрал лакралмур секциялул председатель Супиян Оьмаров.
Турнир дайдихьлай, гьуртту хъанахъиминнахь барчаллагь тIисса ва спортсментуран тIайлабацIу чIа тIисса ихтилат бувна Ккуллал райондалул администрациялул бакIчи, ХIасан Рамазановлул арснал арс Шамил Рустамовичлул.
Цинявппагу хъамал ва ХIасан Асадуллаевич кIулми, ца зумату кунма, буслай бия ванал уздансса хасиятрая, инсаншиву дурурччуну бусравну бувтсса оьрмулия, барчаллагьрай бия тухумрал цIа марцIну дуручлачисса ванал наслулийн.
Ихтилатирттая махъ дайдир­хьуна турнир. Спортрал бяст-ччаллу байбивхьуна дучри ххяххан баврия. Спортсментурал дянив хьуна ка дишаврил, жимру даврил, чару личаврил, пут личаврил, лечаврил, архъан кIункIу даврил бяст-ччаллу. Вайннуву хьхьичIунсса кIанттурду бувгьуминнан дипломру, медальлу ва арцуйнусса бахшишру дуллуна ХIасаннул наслулул.

ХIакьинусса кьинигу жямат бусраврай зумух ласлай бур бюхъу-бажар бусса, цала даву кIанийн дуртун дуллай ик1сса, агьалинай дакI аьтIий ивкIсса ХIасан Рамазановлул цIа. Тухумрал ирсгу, цIагу лайкьну дуручлачисса ХIасаннул наслулул бусравсса хъамалгу, чIявусса чемпионталгу лагма лаган бувна. Ванийнугу исват хъанай бур буттахъал, буттал буттахъал хIур­мат-кьимат цукунсса бикIан аьркинссарив.

Экономикалул элмурдал кандидат ХIасан Рамазанов Ккуллал райондалул даража гьаз бавриву хъунмасса бутIа бивхьусса инсанъя. Аьралуннаву къуллугъ бувну махъ ХIасан занахьуну ур буттал шяравун. Шикку цал ревизорну, яла ревкомиссиялул председательну, колхозрал председательнал хъиривчуну, хъунама экономистну зий ивкIун ур. 1975 шинал ивтун ур Гьарун Саэдовлул цIанийсса Ккуллал колхозрал председательну. Тай шиннардий ванал ккаккан бувну бур цува ахIвал лавай банcсса бюхъу-гьунарданул инсан ушиву. ХIасан Асадуллаевичлул каялувшиву дуллалисса шиннардий Ккуллал шяраву ва арнил кIанттурдайсса аьрщарай бувссар социал ва культуралул объектру. Му бакъассагу, ванал хIарачатрайну бувссар Ккуллал шяравусса 2-мур школа, Бурчу даdагъ байсса фабрика. Ванал каялувшиннаралу чIярусса шиннардий Ккуллал район дуссия республикалул хьхьичIунсса колхозирттал сияхIрай. ХIасан председательну зузисса ппурттуву Ккуллал колхозрал захI­маткаштал цимилгу гьуртту хьуссар Москавлив ВДНХ-лий.

Имара Саидова