[dropcap]М[/dropcap]уний гьуртту хьунни райондалул каялувчитал, культуралул министр Зарема Буттаева; кIулшиву дулаврил ва элмулул министерствалул Лакрал райондалийсса куратор Кинаят Юнусова.

Зулайхат Тахакьаева
Райондалул бакIчи Юсуп МахIамма­довлул бувсунни, Аьра­сатнал Федерациялул Президентнал Май зурул указирттацIун бавкьуну, райондалул бюджетрава учительтурал дянив­сса харжру лахъ бан бювхъушиву 20400 къурушрайн бияннин, школалийн гьаннинсса кIулшиву дулаврил зузалтран — 18550 къурушрайн бияннин, ялун ххи­сса кIулшиву дулаврил зузалтран – 19300 къурушрайн бияннин.
«Культура ва образование жямат­рал гьанур, билаятрал бучIантIимунил гьанур. Мунийн бувну жула мурадругу аьмссар, кIулшиву дулаву ва магьирлугъ канил ка дургьуну дачин аьркин­ссар» — увкунни Зарема Буттаевал. КIулшиву дулаврил управлениялул каялувчи Явсупи ХIамзаевлул бувсунни ларгсса дуккаврил шинал хIасиллая ва ялун нанисса дуккаврил шинал бартбигьин дакIнийсса мурадирттая.
«ХIакьину райондалий зий бур 7 дянивмур даражалул школа, 9 – аьмсса кIулшиву дулайсса школа, 2 – школалийн гьаннин­сса кIулшиву дулаврил идара, 2 – ялун ххисса кIулшиву дулаврил идара. ЦIусса дуккаврил шинал партардах щяикIан тIий ур 800-нния ливчусса оьрчI. Миннава цалчинмур классравун учIан тIий ур 120 оьрчI. ОьрчIал багъравун занан тIий усса ур 160 оьрчI», — кунни ванал.
Ванал ялагу бувсунни Юсуп МахIаммадовлул хIарачатрацIух Гъумук байбихьулул школалул гьанулий ттизаманнул тIалав­шиннардацIун бавкьу­сса, гьарца шартIирдал лащу-щаллусса 60 оьрчIансса кIулшиву дулаврил идара тIитIаврийну оьрчIан кIанттурду биял хьушиву.
Бувсунни гьунар бусса оьр­чIащалсса даврия – райондалул дуклаки оьрчIал республикалул олимпиадарттай ва конкурсирдай дуллалисса гьурттушиндарая; учительтурал пишакаршиву ларай даврия, школарттай низам дуруччаврил даву ци даражалий дуссарив; ялун ххисса кIулшиву дулаврил даврия – Гъумучиял оьрчIал творчествалул къатлувун ва магьирлугърал школалийн заназисса дуклаки оьрчIал хьхьичIуннайшивурттая.
Гъумучиял школалул детсад­рал хъунмур Лиана Муртуз­аьлиевал кIицI лавгунни школалийн гьаннинсса кIулшиву дулаврил идарартту ФГОС — райн бучIаврийну даххана хьушиву школалийн гьаннинсса кIулшиву дулаврийнсса тIалавшиннарду. Миннувасса ца хъанай дур детсадрал педагогтал оьрчIал нитти-буттахъащал уртакьну зузаву.
«Агьамсса давуну ккаклай буру нитти-буттахъал педагогикалул культура ларай даврил ялув зузаву, ми цивппа тарбиячитурансса кумагчитал хьуншиврул. Зий буссар детсадрал сайт, мунийнугу детсадрал ва нитти-буттахъащалсса дахIаву гъан дуллалиссар. Детсадрал тарбиячитурал ва нитти-буттахъал дянивсса арарду цуксса сантирайн дагьну дурив, муксса кумаг хьунтIиссар оьрчIан», — увкунни ванил.. Цала-цала школарттайсса тагьардания ва гьашинусса дуккаврил шинайнсса хIадуршиннарду бусласисса ихтилатру бунни: КIундиннал школалул директор Абакар Гуйдалаевлул; Хьурттал школалул байбихьулул классирр­ттал учительница Шуаьнат Аьбдуллаевал; Гъумучиял школалул биологиялул учительница Асият ХIасановал.
ДР-лул кIулшиву дулаврил министерствалул пишакар Кинаят Юнусовал кIицI лавгунни Лакрал райондалий гьунар бусса дуклаки оьрчIру чансса бакъашиву. Миннал республикалул конкурсирдай гьар шинах гьурттушинна дайшиву ва хьхьичIунсса кIанттурду бугьайшиву. Ларайсса даражалий шайшиву райондалий дуллали­сса мероприятиярттугу.
Цала давриву хьхьичIунсса ккаккияртту хьун дурсса кIулшиву дулаврил зузалтран райондалул администрациялул чулуха дуллунни хIурматрал грамотартту ва арцуйнусса бахшишру.
КIулшиву дулаврил зузалт­рахь цIусса дуккаврил шин барча дуллалисса назмурду дурккуна ШавкIуллал школалул дуклаки оьрчIал.
КIулшиву дулаврил управлениялул каялувчиналгу, махъру лавхъ­сса учительтуралгу ихтилатирттал жям дуллай, Юсуп МахIаммадовлул увкуна:«Дурмунияр данмур ттигу чIярусса дур жучIара. ХьхьичIва-хьхьичI жунма багьлай бур оьрчIру, школа къуртал бувну лавгун махъ цайнува цивппасса оьрмулийн хIадур буллан, жяматрал оьрмулуву цанмасса кIану лякъин вардиш буллан. Райондалул ссуссукьу­сса бюджетрах къабурувгун, ялун ххи­сса кIулшиву дулаврил идарартту жула райондалий зий буссар уква. ХIатта спортрал ва магьирлугърал кIулшиву дулаву багьлух дуван тIалав буллай бухьурчагу, зунттал кIанттурдай ялапар хъанахъисса кулпатирттал ахIвал хIисавравун лавсун». Ихтилат къуртал буллай, цIунилгу барчаллагь увкуна кIулшиву дулаврил зузалтрахь, чIа увкуна тIайлабацIусса дуккаврил шин.