Виваллил иширттал органнал зузалтрал кьинилун хас дурсса мероприятияртту хьунни «Единая Россия» партиялул жяматрал кабакьулул штабраву. Мероприятиярттай гьуртту хьунни виваллил иширттал органнал зузалт, ветерантал, 1999-ку шиналсса дяъвилул иширттал ополчентал, хасъсса аьралий операциялул гьурттучитал, жагьи-жугьулт ва оьрмулул хъуними.
Бусравсса хъамаллуравух бия Аьрасатнал Виричу, ОМОН-далул командирну ивкIсса Загьид Загьидов. Чехословакиянавусса дяъвилул иширттал ветеран, МВД-лул Ветерантурал советрал член Нариман АьбдулмахIаммадов, Дагъусттаннал Халкьуннал Мажлисрал депутат, хасъсса аьралий операциялул гьурттучи Аьбдулла МахIаммадов.
Штабрал чулуха Барчаллагьрал чагъарду буллунни МВД-лул, УВД-лул ва ГИБДД-лул управлениярттал вакилтуран.
Виваллил иширттал органнал зузалт пишалул байрандалущал барча бунни Жяматийсса кабакьулул штабрал хъунама, Дагъусттаннал Халкьуннал Мажлисрал депутат МахIаммад МахIаммадовлул. Ванал барчаллагь увкунни виваллил иширттал органнал зузалтрахь Жяматрал кабакьулул штабрал давриву бихьлахьисса захIматрахлу, ялун нанисса никиращал дуллалисса даврихлу.
Мероприятиялий гьуртту хьунни 100-нния ливчусса инсантал. Миннан ккаккан дунни Ажий Абиевал концерт. Вара кьини шикку хьунни жагьилминнансса ва студентътурансса криминалистикалул мастер-класс. Му бунни МВД-лул Экспертно-криминалистический центрданул хъунама эксперт Руслан Аьбдуссаламовлул. Ванал бувсунни цала пишалул ляличIишиврия ва ккаккан бунни цала даврий ишла байсса криминалистнал чемодан.
Андриана Аьбдуллаева
