Аьрасатнал Конституциялул кьини Росгвардиялул Дагъусттаннал управлениялул хъунама, генерал-майор Александр Орехов кIанттул управлениялул зузалтращал гьуртту хьунни региондалул «Равнение на флаг» тIисса патриот акциялуву. Акция хьунни «Аьрасат – ттул тарихри» паркрал хьхьичIсса майданнив.

Дагъусттаннал Жагьилтурал министерствалул сакин дурсса мероприятиялий гьуртту хьунни Дагъусттаннал бакIчи Сергей Меликов, СВО-лул Ветерантурал ассоциациялул координационный советрал председатель Сергей Макаров, жяматийсса проектирдаха зузисса Аьрасатнал Президентнал управлениялул референт, Аьрасатнал Виричу Алексей Романов, жагьилтурал ва жяматийсса организациярдал вакилтал, исполнительный властьрал органнал каялувчитал.
Мероприятиялул лагрулий 35 метралул лахъшиврий гьаз бунни Аьрасатнал ттугъ.
Цала ихтилатраву Республикалул бакIчинал кIицI лавгунни ва акциялул, билаятрал лишаннал бусравшиву дакъассагу, Ватандалухсса хъуннасса ччавугу исват дуллалишиву.
– Аьрасатнал ттугъ – му жула паччахIлугърал гуж-кьудратрал лишанни. ХIазран бакъар мунил шаннагу рангирал марцIшиву, чувшиву, тIайлашиву майшан тIисса. Жува бусраврай дуручлан аьркинссару билаятрал аьдатру, пахрулий бикIан аьркинссару мунил авадансса тарихрая. ХIакьину хасъсса операциялий жула аьралитал тасттикь буллай буссар Аьрасатнал лишанну, культура ва ххазинартту бат бан къахьунтIишиву, – увкунни региондалул бакIчинал.
Хъирив мероприятиялул гьурттучитал барча бунни генерал-майор Александр Ореховлул.
Мероприятие къуртал хьунни ххаллилсса концертрайну.
Росгвардиялул МахIачкъа­лаллал соединениялул аьралий оркестрданул коллективрал щаллу дунни музыкалул композицияртту.