Ларгсса нюжмардий Дагъусттаннал Халкьуннал Мажлисрал председатель Заур Аскандаров делегациялущал Ккуллал райондалийн ивунни. Делегациялуву бия ванал хъиривчу Камил Давдиев, депутатътал Мурат Пайзуллаев ва Аьбдулла Расулов, элмулул ва кIулшиву дулаврил министр ЯхIия Бучаев, Дагъусттаннал цIуллушиву дуруччаврил министрнал хъиривчу Мамма Алхулаев. Хъамаллурал цалчин ххал бунни Ваччавсса райондалул азархана.
Азарханалул хъунама хIакин КьурбанмахIаммад Щамхаловлул бувсунни, 2000 шинал бувсса ва азарханалий бушиву 70 инсаннансса кIантту. Бувсунни гьантлун 50 инсан кьамул увайсса поликлиникагу бушиву. Ккуллал райондалул бакIчи Шамил Рамазановлул кIицI лавгунни хIакьинусса кьини райондалий бушиву 11 ФАП, Ккуллал шяраву участковая азархана ва Вихьуллал шяраву амбулатория.
Бувсунни Минздраврал программалул лагрулий Ккулувсса азарханагу, Вихьливсса амбулаториягу цIу буккан буллай бушиву, мархлуцIакул бакьин бувну. Парламентрал спикернал азарханалий зузисса медициналул зузалтрахь ва хъин хъанахъиминнахь цIухху-бусу бунни, хIакинтурал даврия ва азарханалийсса тагьардания рязину бушиврухлу хъуниминнайн барчаллагь баян бунни. Хъинчулий кIицI лавгунни «Земский доктор» программалул лагрулий райондалул азарханалий 9 хIакин зий ушивугу. Азарханалия махъ вай бивунни Ккуллал шяравусса Культуралул къатрал иш-тагьар ккаккан. Шяраваллил бакIчи Щамхал Алхасовлул хъамаллурахь бувсунни, 2022 шинал «Культура» национал проектрал лагрулий 300 инсан щяикIайсса Культуралул къатри цIу дуккан дуршиву. Тиккувасса Этнографиялул музейгу ххал бунни хъамаллурал, фольклорданул коллективращалгу цIухху-бусу бунни. Заур Аскандаровлул маслихIат бунни Культуралул къатраву киносуратру ххал дувансса кинозал баврил ва гъинтнил лагерьдайн къалавгун ливчIсса оьрчIру бигьалагансса шартIру дузал даврил ялувгу пикри буван.
«ЗучIа хъинну ххуйсса помещение бур. ОьрчIру кIичIирттаву социал сетирдал биялалий къабитан, кинозал бувну, мяъна куртIсса, ххуйсса кинорду ккаккан дуллалияра оьрчIан, мюнпатсса даву хьунтIиссар», – увкунни ванал.
Спикернал райондалий кьамул бунни инсантал. Хъусращиял шяравасса МахIаммад ХIамзаевлул тавакъю бунни къатлувун щин дуцин кумаг буван. Ваччатусса ХIабибат МахIачевал тавакъю бунни СВО-лий шагьидну жан дуллусса буттал душру Марьяна ва Милана МахIаммадовахъан оьрчIал багъраву кIантту буван. Шамил Рамазановлул ччясса мутталий ва масъала дузал буван бакIрайн лавсунни. Заур Аскандаровлул кIицI лавгунни СВО-лий гьуртту хъанахъиминнал ва миннал кулпатирттал къайгъурдах дагьайкунсса къулагъас дикIан аьркиншиву.
Ваччиял школалул директор Бажи Мирзаевал пищеблок бувну къуртал буван кумаг бувара тIисса тавакъю бунни. Ва масъалагу КIулшивуртту дулаврил ва элмулул министерствалий бивхьунни парламентрал каялувчинал. Ххал бунни ванал Вихьуллал школа баврил бущигу чун бивну буссарив. 2009 шинал буллай байбивхьуну бур 200 инсаннансса ва школа, амма даву дарцIуну дур гьашинунин. Гьашинурив цIуницIа буллай байбивхьуну бур. Шамил Рамазановлул сентябрь зурул 1-нний ва цIусса школа зузи бансса ниятрай зий буссар увкунни строительтал.
Хъювхъиял шяраваллил активращалгу хьунабавкьунни хъамал. Шяраваллил хъунама Аьбдурашид Амировлул бувсунни цукунсса захIматшивуртту дуссарив ва щаллу бувансса масъалартту буссарив. Шяраваллил агьулданул гьаз бувсса масъаларттавух бия яттил ппал дулайсса, даххайсса кIану бакъашиву, миннуя хайр ласун шайсса иш бакъашиву. Заур Аскандаровлул бувчIин бунни ва масъалалухагу федерал даражалий зий бушиву.
ПатIимат Рамазанова
