[dropcap]В[/dropcap]ай гьантрай республикалий хьунни педагог, краевед, чичу Булач ХIажиевлун 100 шин шаврин хас дурсса личIи-личIисса ххаллилсса мероприятияртту.
ЦIуминалийсса Шушиннал школалийгу хьунни Булач ХIажиевлул аьпа абад буллалисса классрал час.
Имара Саидова
Булач ХIажиевлул оьрмулия ва захIматрал ххуллия бусласисса дарс дирхьунни Багъирчаева Умамат Исяевнал.
— Булач Имадутдинович захIмат ххирасса учитель ивкIшиву тасттикь буллай бур буттал улча лахьхьаву мурадрай дуллай ивкIсса цикссагу, хIакьинусса кьини жунна кьариртсса ахттаршиннардал. Булач ХIажиев дяъви байбивхьусса цалчинсса гьантрайва лавгун ивкIссар хушрай дяъвилийн уцара тIий. Цувагу талай ивкIссар дяъви къуртал хьунцIа ва шавай зана хьуссар 1945 шинал август зуруй.
Республикалул музейрдаву хIакьинусса кьинигу яхьуну дуссар ванал цала учениктуращал археологиялул экспедициярттайн лавгун ахттар дурсса хъус-экспонатру. Дагъусттаннал тарих куртIну лахьхьаву мурадрай Булач дачин дурну ивкIссар телепередачартту. Ванал учениктал хIакьинусса кьинигу ванайн бухкъалагайсса барчаллагьрай буссар, — тIий буслай бия Умамат Багъирчаева.
Булач ХIажиевлул творчествалул ххуллия ва ванал чIивимур душ Умаматлул дакIнийн бичавурттая гьарта-гьарзану бусласисса докладру бунни 11-мур классрал дуклаки оьрчIалгу.
