Ххувшаврил байрандалул хьхьичI кьини Дагъусттаннал бакIчи Сергей Меликовлул аьралийтуран паччахIлугърал наградартту дуллунни. Ванал кIицI лавгунни дяъви байбивхьусса гьантрайва Дагъусттаннал чиваркI, цивппа хушрай аьрайн тIайла бу­ккира тIий, военкоматирттайн занай бивкIшиву, тай хьхьичIсса 4 гьантлул дянив 3000-нниха ливчусса чиваркIуннал хушрай аьрзарду ­буллуну бивкIшиву.

– Фронтрайн щаллу-ккурккисса кулпатру лаглай бивкIссар. Ахъушиял райондалиясса ца кулпатрава 12 инсан аьрайн лавгссар, арсру ва миннал арсру хIисав бувну. Ахттиял шяравасса ца ниттил 7 арс лавгссар», – увкунни Меликовлул. Бувсунни щалла дунияллийх цIа ларгсса Вирттавравух бушиву АхIмад-Хан Султан, Валентин Эмиров, МахIаммад ХIажиев.
Аьмну наградартту дуллунни 30 инсаннан. Вайннавух ия Аьрасатнал президентнал Дагъустта­ннал Постпреднал хъунаманал цалчинма хъиривчу, «Каспий» батальондалул командир Табир Маликов. Ларайсса федерал наградарттан лайкь хьунни МахIаммад Мукошдибиров, ХIабиб Хамутаев, Владимир Деревянко, Степан Свиридович, Микаил МахIаммадов ва цаймигу къучагътал.
«За проявленное мужество» тIисса медаль дуллунни Халкьуннал Мажлисрал депутат Расим ХIажиагъаевлун. Лахъсса кьимат бивщунни оьрмулун нигьачIаву дунура щавурду дирми ххассал буллалисса лейтенант Арсен Мусаевлул гьунарданунгу.
Бия наградарттан лайкь хьуцириннавух Къизилюртуллал райондалул Нечаевка шяравасса «Родничок» тIисса садикрал хъунмур ПатIимат МахIаммадовагу. Меликовлул хьхьичIрагу цIа дурна ва садикрай дурсса, аьралий лаххиялувусса 200 оьрчI гьурттусса Ххувшаврил парадрая. Ва видео щалва билаятрайх ппив хьунни. ПатIиматлун дуллунни «Дагъусттаннал кIулшиву дулаврил лайкь хьусса зузала» тIисса цIа.

ПатIимат Рамазанова