Ттигъанну Лакрал райондалийн даврил аьрххилий увкIунни Аьрасатнал ПаччахIлугърал Думалул депутат Артем Бичаев. Ванащал ия Щалагу Аьрасатнал Жяматрал фронтрал Дагъусттаннайсса каялувчи Жамалуттин Шигьабуттинов.
Райондалул администрациялул актовый залдануву агьалинащалсса хьунабакьаврий депутатнал ххалбивгьунни шяраваллал социал-экономикалул буруккинтту, ххуллурду бакьин баврийн, ттукIрал ва связьрал дузалшиндарайн, газ буцаврийн багьайсса ва цаймигу агьамсса суаллу. КIицI лавгунни хьунабакьаврий сукку бувсса цумур-цагу суал цала къулагъасралун ласунтIий бушиву.
Ахирданий район хьхьичIуннай даврил ххуллий дакI марцIну захIмат бихьлахьиминнавасса цаппарассаннан буллунни Барчаллагьрал чагъарду.
Юсуп МахIаммадовлул барчаллагь увкунни Артем Бичаевлухь, райондалийн увкIун, агьалинащал хьунаакьаврихлу.
Муния махъ депутат хьунаавкьунни хасъсса аьралий операциялий Ватандалул мурадру буруччаврил ххуллий жанну дуллуминнал ва хIакьинугу тийх аьралий бурж биттур буллалиминнал гъанчунащал.
Ххал бивгьунни аьралийтурал кулпатирттал оьрмулул шартIру къулай дансса чаранну: социальныйну буруччаврийн, медициналул кумаграйн, оьрчIан кIулшиву дулаврийн дагьайсса ва цаймигу кумагирттал программартту. Бичаевлул кIицI лавгунни хIакьину паччахIлугърал хьхьичIххуттай бихьлай бушиву хасъсса аьралий операциялий гьуртту хъанахъиминнал кулпатирттал буруккинтту.
«Укунсса хьунабакьавуртту чарабакъа аьркинссар, аьралийтурал кулпатирттал буруккинттая властьран баяншиврул. Аьралийтурал кулпатирттан асар хьун аьркинссар властьрал чулухасса аякьа ва жяматрал кумаг. Жу шайссаксса хIарачат буллай буру миннал кулпатирттал чIарав бацIан. Зул арсру, ласру, уссурвал, цала жаннай хIайп къакуну, талай буссар Ватангу, жува цинявппагу буруччаврил ххуллий. Жу вания тинмайгу аьркинсса къулагъас дуллантIиссару хасъсса аьралий операциялий талатисса аьралийтурал кулпатирттах», – увкунни Артем Бичаевлул.
Мичча депутат лавгунни Совет Союзрал Виричу Муса Маннаровлул цIанийсса Гъумучиял школалийн. Директор Соня Макьаевал бувсунни школалул авадансса ва цIанихсса тарихрая. Депутатнащалсса экскурсиялул лагрулий бувсунни школалул къатри дурну душиву ттизаманнул тIалавшиннардацIун бавкьуну. Депутат ивунни школалул хIаятраву дацIан дурсса хасъсса аьралий операциялий чувшиврий жанну дуллуминнансса мемориалданучIан. Аьпалул багъраву бувгьунни мурхь.
Зулайхат Тахакьаева
