Шагьрулул администрациялул чулуха
Гьар шинах кунна, ва ххуллухьгу июньдалул 1-нний, ОьрчIру буруччаврил кьини, оьрчIансса личIи-личIисса шадлугъру хьунни жулла республикалий, хаснува хъуншагьрулий.
М. Горькийл цIанийсса Оьруснал театрданул хьхьичIсса майданнив хьунни МахIачкъала шагьрулул администрациялул хIадур дурсса шадлугъ.
Шагьрулул бакIчи Юсуп Умавовлул барча кунни оьрчIахь байран, чIа увкунни вайннан бавкьусса кулпатирттавусса талихIрайсса оьрму, чIурчIав дунни жуйвасса буржгу бушиврий оьрчIан багьайкунсса оьрчIшиву щаллу даву.
– Оьрмулул хъуниминнал мурадну бикIан аьркинссар оьрчIру цIуллу-цIакьну ва талихIрай оьрму бутлати баву. Мукунма тIайлашиву ххирасса, цалва шагьругу, республикагу, билаятгу ххирасса инсанталну тарбия баву, вай хьхьичIунмай бачинсса шартIру щаллу дуллалаву, – увкунни ванал.
Гихунмай сахIналийн бувккунни кувннаяр кув яргсса, кувннаяр кув гьунар бусса чIава артистътал: ОьрчIал филармониялул ва искусствардал школардал балайчитал ва къавтIалт. Мукунма Аслийсса культуралул центрдал коллективругу.
ОьрчIру – оьрчIан
Оьруснал театрданул хьхьичIсса майданнив ОьрчIру буруччаврил кьини мукунна хьунни республикалул «Маленькие горцы» цIанилусса фестивальгу. Ва сакин дурну дия Республикалул Халкьуннал творчествалул къатлул.
ОьрчIру барча буван сахIналийн бувккунни Республикалул Халкьуннал творчествалул къатлул хъунмур Марита МухIадова, Дагъусттаннал Музыкантътурал союзрал председатель Хан Баширов, Дагъусттаннал Хъаннил союзрал председатель Интизар Мамутаева ва чIявусса цаймигу. Фестивальданий гьуртту хьунни республикалул муниципалитетирттаясса оьрчIру. СахIналийн бувксса гьарцагу коллектив, гьарцагу оьрчI лайкь хьунни Дагъусттан Республикалул Культуралул министерствалул чулухасса дипломирттан.
Шиккува, Расул ХIамзатовлул цIанийсса проспектрай, чIава художникталгу бия цалвами гьунарду ккаккан буллай.
Дагъусттаннал М. Жамаллул цIанийсса Художествалул училищалул студентъталгу бия суратру дихьлай.
Ссихьрал театрданучIа
Дагъусттаннал ссихьрал театрданул ва кьинилийннин оьрчIан цIа куну хIадур дурну дия «Этот мир мы дарим детям» тIисса программа. Цинявнналагу архIал ва кьини щаллу бувна ччянива мюрщиминнан ва хъуниминнан ххира хьусса балайрду, дурккуна назмурду, хьуна личIи-личIисса викторинарду. Вайннуву оьрчIан яла-яла хIаз дирзуна цанна ххирасса мультфильмрдацIун дархIумур. ОьрчIру тяхъа буккан буллай, мяйжаннугусса байран хьунмур буллай бия клоунтал. Вайннал хIарачатгу щаллуну бакIуйн бувккуна – байрандалия оьрчIру ва вайннащал бувкIсса оьрмулул хъуними лавгуна хъинну рязину.
Миллатрал музейраву
Дагъусттан Республикалул Национал музейрал коллективралгу хIадур дурну дия оьрчIансса программа. Ванил лагрулий ва кьини дурна личIи-личIисса экскурсияртту, оьрчIан буттал улклул тарихрацIун, культуралуцIун ва багьу-бизулуцIун бавхIусса цIусса чIявусса затру кIул хьуна.
ОьрчIру гъирарай гьуртту хьуна ва кьини музейраву хъанахъисса мастер-классирттайгу. Ва чIумал нину-ппу вичIилий бия оьрчIру тарбия бавриясса, вайннал гьунарду итххяххан бавриясса мюнпатсса лекциялух.
Ва кьинилун хасъсса шадлугъру мукунна хьунни шагьрулул цайми-цайми кIанттурдайгу: шагьрулул Хъун-майданнив, Яруссаннал театрданучIа, Пушкиннул цIанийсса кIичIираву, Октябрьданул 50 шинал цIанийсса паркраву…
Магьравасса ва мультфильмрдавасса цанма ххирасса персонажирттащал архIал гьан дурсса гъинтнил цалчинсса кьини хьунни оьрчIан хъунмасса хIаллай дакIний личIансса.
Бадрижамал Аьлиева
