ОьрчIру буруччаврил кьини Дагъусттаннал предпринимательствалул ва инвестициярттал агентствалул каялувчи ХIажимурад Исрапилов ивунни МахIачкъалаливсса ОьрчIал ва чIаважагьилтурал реабилитациялул центрданийн.

95 инсаннансса кIану-тахру бусса ва центрданул гьар кьини кьамул увайсса ур 60-70 инсан. ХIажимурад Исрапиловлул кIицI ларгунни цIуллушиврул нукьсансса оьрчIан кумаг буллалисса центрданул даврил агьамшиву. Идаралул коллективрал бувсунни цуку-цукунсса кумаг бувайссарив реабилитациялийн бувкIсса оьрчIан.
«Центрданул зузалтрал оьрчIахсса къулагъасрал, даву дюрхъуну дуллалаврил асар биян бунни. Гьарца чулуха сантирайн руртун дур даву, чIалай бур дакIцIуцIаврий ва даву ххуйну кIулну зузисса пишакартал бушиву», – увкунни ванал.
Хьунаавкьунни ХIажимурад реабилитациялул курсирдайсса оьрчIащал ва нитти-буттащал, бувсунни цувагу хIадурну ушиву укунсса оьрчIал оьрму цахъисвагу къулай-чанна буллалисса иширттавух хIала уххан.
«Жула буржри вай оьрчIан кумаг буван, оьрмулуву, агьалинаву занакьулу хъанан вайннан куклушин дузал дуван. Гьарцагу оьрчIан чIа тIий ура оьрчIшиврул ххарисса асарду, цIуллушиву, вайннал нитти-буттан – ссавур. Жунма, хъуниминнаннив, мудангу дакIний бикIан аьркинссар, байран кьинирдай бакъассагу, гьар мудангу, оьрчIру – тирхханнурду, ххаришивуртту хъанай бушивруцIун, жулва кумаграх мюхтажсса инсантал бушиву, жуйрасса тIалавшинна кIулну къуццу тIун аьркиншиву жува, вайннан ххуйсса оьрму дузал буллай», – увкунни бусравсса хъамаличунал.

ПатIимат Рамазанова