ЦIуминалийсса ЦIуссалакрал шяравусса «Сказка» тIисса оьрчIал багъраву хьунни ОьрчIру буруччаврил кьинилун хас дурсса ихIсандалул ярмарка. Гьашину ва садикрай кIилчинни хъанахъисса цIуллу-сагъшиврул ссуссукьушиву дусса оьрчIан кумаг баву мурадрайсса акция.
Этникалул зумуну чIюлу бувну бия садикрал хIаятравусса беседкартту. Шикку дия садикрал зузалтрал, оьрчIал ва нитти-буттал дурсса творчествалул давуртту, миллатирттал дукрарду.
Ярмаркалийн бувкIун бия шяраваллил жямат, властьрал вакилтал ва личIи-личIисса идарарттал активистътал.
Бусравсса хъамаллуравух ия ДР-лул Халкьуннал Мажлисрал депутат Артур Исрапилов, ДР-лул кIулшивуртту дулаврил министр ЯхIия Бучаев, Лакрал миллат цIусса миналийн бизан баврил ва Аухуллал район цIу дуккан даврил масъалартталсса буллалисса ДР-лул ХIукуматрал Управлениялул хъунама МахIаммад-ХIажи Айдиев, ЦIуссалакрал райондалул бакIчинал хъиривчу Арсен Гъазиев, «Дирекция строящихся объектов «Новострой» идаралул хъунама Малик Асбаров ва цаймигу.
Хъамаллурал кIицI лавгунни, оьрчIаха аякьа даву мурадрай дуллалисса ярмарка хъуннасса агьамшиву дусса хъанахъишиву. Вай укунсса акцияртту, мероприятияртту райондалул цаймигу идарарттал зузалтран эбратну хьун аьркиншиву.
МахIаммад-ХIажи Айдиевлул барчаллагь увкунни мероприятиялул сиптачиталну бувксса «Сказка» садикрал зузалтрахь, махъ буллунни вания тихунмай вайннан шайсса кумагру буллан.
Ххуйсса концерт ва мастер-классру ккаккан бунни садикрал тарбиячитурал. ХIасил, ихIсандалул ярмарка кIура давуна байрандалийн. Шиккун бувкIцири бия мюрщултрал дурсса творчествалул давурттал лагма лаглай, машан ласлай.
Ва ярмаркалий, сувенирду, миллатирттал дукрарду, оьрчIал дирхьусса суратру ва цаймигу кьай-кьуй дахлай, ихIсандалул фондравун дартIунни 173 530 къуруш. Миннул ялун 50 азарда къуруш дирчунни Артур Исрапиловлул, 100 азарда къуруш — «Водаком» ООО-лул гендиректор Билал Узаловлул ва 100 азарда къуруш — «Дорсервис-09» ООО-лул гендиректор Багьауттин Идрисовлул.
Шикку дартIсса арцу ишла дантIиссар цIуллу-сагъшиврул ссуссукьушиву дусса оьрчIан кумагран.
Имара Саидова
