ХIакьину Лакрал райондалий ливчIун ур
увагу кIия гьурттучи
[dropcap]Л[/dropcap]аргсса хамис кьини Гъумук Хъунмасса Буттал кIанттул цIанийсса дяъвилия зана къавхьуминнал гьайкалданучIа хьунни Ххувшаврил 73 шин шаврин хас бувсса аьдатравун багьсса Аьпалул Вахта тIитIлатIисса батIаву.
[dropcap]Б[/dropcap]уттал кIанттухлу жанну дуллуми дакIнийн бичин бувкIун бия райондалул бакI дургьуми, шяраваллал бакIчитал, идарарттал хъуними ва зузалт, учительтал, дуклаки оьрчIру. Гьашинусса Аьпалул Вахталий гьуртту хьунни «ЧIавааьрал» тIисса щалагу Аьрасатнал жагьилтурал суккушиндаравух гьурттусса Лакрал райондалул чIава аьрал.
Исвагьисса формалувусса оьрчIру ва душру хIурматрай къаралданий бавцIуна гьайкалданучIа.
ХIакьину Лакрал райондалий ливчIун ур увагу кIия дяъвилул ветеран: ГьунчIукьатIатусса Ибрагьимов Жамалуттин ва Ттурциятусса Аьлиев Шяпи. Убурдал шяраватусса Къардашов ХIусман вай гьантрай аьпалухьхьун лавгунни.
[dropcap]Р[/dropcap]айондалул администрациялул ва депутатътурал цIания дяъвилул ветеранталгу, Аьпалул Вахталийн бавтIмигу барча буллай, райондалул бакIчи Юсуп МахIаммадовлул кIицI лавгуна Ххувшаврил байрандалул хьунийн райондалул щархъавусса Хъун дяъвилия зана къавхьуминнал аьпалунсса гьайкаллаха райондалул администрациялул хъуннасса аякьа дуллай бушиву, ми гьарца шинах цIу дуккан дайшиву.
— Ххувшаву ларсун 73 шин гьарчагу, никирая никирайн яла къагьантIиссар та дяъвилул къювугу, асардугу.
Лакрал райондалий бакъахьунссар цавагу кулпат Хъун дяъвилул щавщи къабивсса. Жулла райондалия аьрайн лавгун бур ряхазарунная ливчусса чиваркI. ЧIивисса лакрал миллатрава ххюннал лавсун бур Виричунал цIуртти. Хъинну чIявусса лайкь хьуну бур орден-медаллан. Хъиннува чIявур дяъвилул аьйплу бувми. ЦIу къизгъинний талай къабивкIхьурчагу,
Ххувшаву ласавриву цаламур жандалул бутIа бивхьуссар ЗахIматрал фронтрай гьурттушинна дурминналгу. Ккаши-мякь бувхIуну, цалла дусса хъус-хъиншиву дяъвилун тIайла дуклай бивкIссар ми. Лув-ялув шамилла лайкь хьуссар Лакрал район ПаччахIлугърал комитетрал обороналул Занази ЯтIул Ттугълин ва му абадлий ливчIссар райондалухьва. Хъун дяъвилийгу, къинттуллухгу ппухълуннал дурсса виричушиврул, чувшиврул, захIматрал эбратрай тарбия буллан аьркинссару жува жула хъирив нанимигу, — увкунни цала лавхъсса мукъуву Юсуп МахIаммадовлул.
Лакрал ва Ккуллал районнал аьрали комитетрал хъунама ХIасан Масуевлул кIицI лавгуна Буттал КIанттул цIанийсса дяъвилий ларсъсса Ххувшаву жулва халкьуннан ххирану дарцIушиву – 27 миллион халкьуннал ливтIусса, миннава Лакрал райондалия 3200 инсан зана къавхьушиву; 1710 шагьру ва 70 азарда шяравалу лекьа-пIякьу хьушиву. Мунияту бюхттулсса Ххувшаву ларсминнал – халкьуннал ополчениялул, душманнал къинттуллухсса партизантурал кьюкьрал, дяъвилийн хушрай лавгминнал виричушивуртту хъамаритан къабучIишиву.
— Жун, жагьилсса никиран, тачIав хъамакъабитантIиссар Ватан дуручлай, дяъвилул майданнайва ливчIсса жулва ватанлувтал. Гайннал аьпа бурувччуну, хъирив нанисса никирайнгу биян баву жула яла къалагайсса буржри, — увкуна жагьилтурал цIания Ибрагьимова Зульмирал.
Дяъвилия зана къавхьуминнал рухIирдая алхIам бувккуна Гъумучиял мизитрал имам МухIаммад-Маннар Бариевлул.
Зулайхат Тахакьаева
