![](https://ilchi.info/wp-content/uploads/2022/03/nurmagomed_gadzhimagomedov_kuli5.jpg)
2016-ку шинал, декабрьданул 29-нний, Ккуллал райондалул жяматрал хIурматрай хьунабавкьуна ганиннин дунияллул чемпионтал хьусса ЦIийшиял шяравасса Рамазан Абачараев ва Къяннал шяравасса НурмахIаммад ХIажимахIаммадов. Абачараев Рамазан греко-римуллал лачIун уккавриву хьуну ия Аьрасатнал ва дунияллул чемпион. ХIажимахIаммадов НурмахIаммад хьуну ия кикбоксинграл спортрал Аьрасатнал Аьрали гужирдал шамийла чемпион, Дянивмур Федерал округрал чемпион, Европанал чемпион, Ка хIала даркьусса ияврил дунияллул чемпион. Вай жагьилтал хъинну хIурматрай хьунабавкьуна та чIумал жяматрал.
Амма инсаннал оьрму ччимур чIумал ччимур чулийнмай бахханагу шай. БувкIунни жучIанма пашмансса хавар. Аьрасатнал билаят буруччаврил цIанийсса иширттаву Къяннал шяравсса НурмахIаммадлул цала жан кьурван дурну дур тIисса. Гьакссагу хIайп, укун ххаллилсса жагьил, зунттал арс ахиратрахьхьун гьан! Спортраву дакъагу, НурмахIаммадлул дяъвилул аривгу ккаккан дурну дур чувшиву, асланшиву. Ва асланшиву Аьрасатнал Президент Путиннунгу хъинну асар хьунни. Ванал дурсса чувшиврунгу кьимат бивщуну, НурмахIаммадлун дуллуни «Аьрасатнал Виричув» тIисса цIа.
Нагу, вания гихунмай ихтилат лахъи къабуллай, жула миллатрал хьхьичIун ласлай ура, 2016-ку шинал Ваччав хьусса, НурмахIаммадлущалсса хьунабакьаврицIунсса лахIзардал цаппара суратру.