Дагъусттаннал Росгвардиялул «Скорпион-Каспий» ОМОН-далул зузалтрал МахIачкъалаллал прокуратуралул вакилтуращал ва МЧС-рал Агьаммур управлениялул ГИМС-рал инспектортуращал цачIу профилактикалул мероприятияртту дунни Чиркей водохранилищалий. Вайннал ххал бунни пассажиртал жамирдай буцлациний федерал законодательствалул тIалавшиннарду цукун дуручлай бурив.

Жамирдал заллухърунначIа ххал бунни мюрщи жамирду закондалий ккаккан бувсса куццуй сияхIрай бивхьуну бурив, минначIа ми бачин бансса ихтиярду дурив ва бортрал номерду ккаккан бувну бурив.
Рейдрал лагрулий ххал унни 27 инсан, 20 мюрщи жами ва 6 причал. Ялун ливчунни низамрайн къабувцуну зузисса база-стоянка, мукунма жамирду тIалавшиннарду къадурурччуну зузи бувсса, ихтияр дакъасса инсантурал бачин буллалисса, миннуй инсантал буцлациний низамрал тIалавшиннарду къадуручлачисса ишру.

Андриана Аьбдуллаева