Ноябрьданул махъра-махъсса алхIаткьини, аьдатрайн бувну, кIицI лагай Ниттихъал кьини. Ва кьинигу хIисавравун ларсун, бусанну  оьрмулуву чIявусса захIматгу бивхьусса, 9 оьрчIал нинушивугу дурну, ми ччаннай бацIан бувсса, КIамахъаллал шяраватусса МахIаммадлул душ Илиясова Аминатлуя.

Бувну бур ва 1934 шинал. Ва бакъасса, кулпатраву ялагу ца душ ва кIия арс бивкIун бур. КIамахъалив 4 классгу къуртал бувну, 7-мур классравун бияннин Аминат Уруву дуклай бивкIун бур. Та чIумал 7 класс­рал кIулшивуртту думиннаща, Гъумук 6 зуруйсса курсругу бувккуну, учительну зун бюхълай бивкIун бур. Амма, душру шаппа хъинссар тIисса кьянкьасса зунттал аьдатрайн бувну, гихуннаймур дуккаву дан ванихьхьун буттал ихтияр дуллуну дакъар.  Аминат 7 классгу бувккуну бацIайссияв: МахIачкъалалив Культпросветучилищалувун заочнайну дуклан бувххун бур. Ванил захIматрал ххуллул дайдихьугу хьуну дур зунттавусса КIамахъаллал щарнил клубрая. КIикку зий бунува ташулул хьуну бур Ппалассуннал шяравасса Хизрил арс Илияслущал. Цаппара хIаллава колхозрал каялувчитурал жагьилсса кулпат аривсса къутандалийн тIайла бувккун бур.

Ми диркIун дур зунттаву­сса колхозирттал кутак цIакь дуллалисса, аривсса аьрщив «махь дан» жагьилтурал бригадар­тту кьанив гьан буллай бивкIсса 50-ку шинну. Илиясгу му ппур­ттуву, механизатортурал школагу къуртал бувну, колхозрал трактор-комбайналуха зузисса, акъа чара бакъасса зузала ивкIун ур. Арив зун тIайла бувксса жагьилсса кулпатирттан ва укунмасса зузалтрал бригадарттан, зунттавунгу, кьанивгу къазанай, ца миналий бацIаншиврул, «изба-читальнягу» тIивтIуну, ганил хъунмурну Аминат бивтун бур. Га чIумал къутандалий колхозрал къатраву ялапар хъана­хъисса 16 кулпат бивкIун бур.

ХIасил, къутандалий ци­лла даврийгу зий, МахIач­къалалив училищалуву ккагу-ккалаккисса Аминатлул пикри бувну бур, МахIачкъалалив Культуралул министерствалийн лавгун, шяраву клуб бан багьлай бурча, цан кумаг бувара учин. Ванил бусаврийну, гикку бакIрайн багьну бур ТтурчIиял шярава­сса Галина тIисса хъамитайпа. Аминатлух вичIигу дирхьуну, ганил махъ буллуну бур му мурад щаллу бансса чаран ля­къин. Най буна къабарчагу, ца-кIира шинава ахиргу итадаркьуну дур клуб бансса арцу. Му чIумал колхозрал председательну ивкIун ур ХIажимиев МахIаммад.

Муналгу колхозрал чулуха шаймур бувну бур шяраву культуралул идара бан.
ЦIунилгу шяраву оьрму щурун бивкIун бур, дяхтта колхозирттал давурттай зий, хьхьувай клубраву бигьалаглай, бялахълай. Мукун ххуйсса чIунну диркIун дур гай. Щарнил жагьилтуращал, колхозниктуращал цачIу хIадур дурсса концертирттащал лагайсса бивкIун бур чIаххуврайсса Карашрал, Кьубиял къутаннайн, нугъай-къумукь яхъанахъисса Тамазатюбелийн ва колхозрал ятти­къушайх. Клубрал сахIналий бишайсса бивкIун бур вайннал «ХIажияв ва ХIабибат», «Шагьалай» тIисса пьесардугу. Да­гъусттаннал ухссавнийсса районнай 1954-кусса шинал гуж­сса зарзала хьуну, клуб левкьун бивкIун бур. ЦIусса клуб бан­сса кашигу колхозрахь дакъану, мадара хIаллай шяраву культуралул идара бакъа, тиха-шиха дуркIсса концертру, Лакрал театрданул пьесардугума кка­ккан байсса бивкIун бур колхозрал складраву. Му ххуллухгу Аминатлун пикри хьуну бур цIунилгу Культуралул министерствалийн кумаг бувара тIисса тавакъюрай буккан. Ахиргу 1982 шинал итадаркьуну дур вайннан шяраву клуб бансса арцу.

Дуллуну диркIссар Аминатлун цIа Нину-виричу тIисса награда ласунгу. Амма ацIа оьрчIавасса ца душ шанна шинаву щинавун бювкьсса бала-апатIрая махъ къадулун хIукму хьуну бивкIун бур. Мугу бувчIин захIматсса зат бур. Аминат жуна чIявучин кIулсса, чичу ва публицист, «ЦIубарз» журналданул редактор Хизри Илиясовлулгу нинур.