ЦIуссалакрал райондалий лахъа-хъунну кIицI ду­нни ниттил мазрал байран. Школардай ва оьрчIал багъирдаву хьу­нни Ниттил мазрал кьинилун хас дурсса шадлугърал мероприятияртту.

Укунсса мероприятиярттайну оьрчIан хъиннува асар шай цала маз, миллатрал культуралул ирс буруччин аьркиншиву, ниттил мазрал личIи-личIисса никирттал дахIаву цIакь дан кумаг байшиву.

Учительтал ва тарбиячитал ххуйну хIадур хьуну бия байрандалийн. Ччянира дурну дия мероприятиялул сценарий. ХIадур дурну дия личIи-личIисса викторинарду, конкурсру, дуклаки оьрчIан ва мюрщултран мазрах гъира бутансса творчествалул заданияртту. Байрандалул лагрулийсса шеърирду буккаврил конкурсрай оьрчIал пасихIну дурккунни цала-цала мазурдий­сса назмурду, усттарну ккаккан бунни халкьуннал магьравасса парчри.

Байрандалий мукунна тIиртIуну дия тIабиаьтрал караматшиву, буттал кIанттул аьдатру ккаккан дуллалисса оьрчIал дирхьусса суратирттал выставка.
Хьунни оьрчIру хъиннува цала миллатрал культуралущал кIул буллалисса халкьуннал сянатирттал, къавтIавурттал, тIуркIурдал мастер-классру. Райондалул школардай мукунна хьунни ниттил мазран хас дурсса классрал ссятру. Учительтурал балжину бувчIин бунни оьрчIан ниттил мазрал агьамшиву, ми­ллат яхьуншиврул маз буруччин аьркиншиву.

Ниттил мазрал кьинилун хас дурсса мероприятияртту хьу­нни шяраваллал Культуралул къатравугу.