Дагъусттаннал Росгвардиялул «Горец» ОМОН-далул зузалтрал Виваллил иширттал министерствалиясса уртакьтуращал цачIу бувсса «Анаконда» тIисса профилактикалул операциялул лагрулий бувгьунни наркотикру ва психотропрал затру ишакаш баврийн щак багьлагьисса шама инсан.

МахIачкъалалив, машиналуву цIухла бивхьуну, водительначIа лявкъунни ца грамм мефедрондалул ва арулва капсула прегабалиндалул. Мунияр махъ вайннахьхьун иривунни мефедрондалущалсса (0, 28 грамм) адамина. Шамилчинма иривунни прегабалин бахлай унува. ЦIухла бивхьуну, ваначIа лявкъунни 50 граммрая ливчусса гужну асар шайсса дарув. Вай иширттал хIакъираву сукку дунни уголов делорду.