Декабрьданул 16-нний МахIачкъалалив «Аьрасат – ттул тарихри» тIисса музейраву хьунни хасъсса аьралий операциялий гьуртту хъанахъисса аьралитуран кумаг буллалиминнан «Народный фронт. Все для победы!» тIисса хIурматрал лишан дуллалисса мажлис. Мероприятиялул сиптачитал ва сакиншинначитал хьунни «Народный фронт «За Россию» тIисса щалагу Аьрасатнал жяматийсса суккушинна.
Дагъусттаннал региондалийсса Халкьуннал фронтрал СВО-лий гьуртту хъанахъисса аьралитуран кумагран 2022-ку шиная шиннай тIайла дурккун дур 400-хъул тонна гуманитар кьайлул. Ва давриву вайннан хъунмасса кумаг буллай бур республикалул властьрал, жяматийсса идарарттал ва Дагъусттаннал агьалинал.
Халкьуннал фронтрал чулухасса наградартту дуллалисса мажлис тIивтIунни Дагъусттаннал ХIукуматрал председательнал хъиривчу Ризван ГъазимахIаммадовлул.
Ва мажлисрай наградартту дуллунни МахIачкъала шагьрулул бакIчи Юсуп Умавовлун, МахIачкъала шагьрулул 35-мур гимназиялул директор Чакар Мажидован.
Халкьуннал фронтрал чулухасса наградартту дуллунни Украиннал аьрщарай хасъсса аьралий операция байбивхьуния шинмай аьралитуран кумаг буллалисса къучагъсса хъамитайпа, Каспийск шагьрулий ялапар хъанахъисса ЧIяйннал шяравасса Бадуржигьан Рамазанован ва аьралий буржру бартбигьлай къучагъну жан дуллусса цила ласнал аьпалун хасну аьралитуран янна дурухлахисса «Zов героев» тIисса цех тIивтIусса Майсарат Багьауттинован. ХIакьинусса кьини ва цехраву Майсарат бур аьралитуран гъилисса гъухъри, ссурссу ларкьусса, дахьра ца лажин дакъа къачIалачIисса, куклусса кьяпри ва спальный мешокру бурухлай.
Бадуржигьаннул аьралитуран цимилгу тIайла дурккунни аьрайн гьавккури, бакъухъ ва цаймигу дукрарду, гъилисса жуларду, шанийх дичурду, кIараллу ва кIараллал къатри бивхьусса авадансса посылкартту. Аьралитурансса кIараллугу ванил цила карунних бурувххуну бия.
ДакIнин бутанну, Бадуржигьан Рамазанова ва Майсарат Багьауттинова чIявучин кIулшиву хасъсса аьралий операциялийсса аьралитуран ччя-ччяни кумаг буллалаврийну. Вайннал яхI-къириятрая ва чумартсса тIуллая кIул хьуну, хIала-гьурттуну зий бур жула республикалийсса «Народный фронтрал» отделениялул вакилтал.
– Цимилгу исват хьунни жула инсантурал дакIнил сахаватлувшиву ва чумартсса тIуллу. Украиннал аьрщарай хасъсса аьралий операция байбивхьуния шинмай цинявппагу инсантал хIарачат буллай бур аьралитуран кумаг буван, шайсса куццуй миннал чIарав бацIан. Цикссагу ккуранну дур аьралитуран кумаг баву мурадрай дурсса.
Зу кунмасса инсантал жула аьралитурал махъ буссаксса, ххувшаву ласунсса вихшалагу хъиннура цIакь хъанай дур. Жула халкьуннал дугъришиврул, ка-кумаг бан хIадуршиврул, дуллалисса чумартсса тIуллал дакI дуллай дур ва гьавас бутлай бур аьралитуравун. Дунияллийсса оьрмулул дуцин хъинбала-хъиншивурттайнур дувайсса. Буниялагу барчаллагьран лайкьссар къучагъну аьралий буржру бартбигьлагьисса жагьилтурал махъ бацIан хIадурсса уздансса инсанталгу, – увкунни Юсуп Умавовлул.
– Жува бакъа тайннан кумаг щилли бантIисса. Жула аьралитуран кIулну бикIан аьркинссар цахва ялугьлай бушиву ниттихъул, ссурвал, уссурвал, оьрчIру ва маччами. Аьралий операция наниссаксса хIаллай жува буржлувссару тайннал чIарав бацIлан, тайннан шайсса ка-кумаг буллан, – тIий бур Бадуржигьан.
Мажлисрай хасъсса аьралий операциялул гьурттучитуран хас бувсса балай увкунни Вагьаб Багьауттиновлул душнил Мисай Багьауттиновал.
Имара Саидова
