Адыгеянал Республикалул бакIчи Мурат Кумпиловлул Аьрасатнал Жяматийсса палаталул АПК-рал ва шяраваллил кIану хьхьичIунмай бавриха зузисса комиссиялул председатель Айгун МахIаммадовлун республикалул яла лараймур награда дуллунни – «Адыгеянал Республика хIасул дурну 100 шин шаву» тIисса медаль.
ПатIимат Рамазанова
– Жяматийсса палаталувусса ттул коллегал, Хъунисриннал советрал председатель Исхак Машбашлул Мурат Кумпиловлухь ва ПаччахIлугърал советрал (ХАСЭ-лул) председатель Владимир Нарожныйхь бувсхьунссар жул комиссиялул агпромышленностьрал комплекс ва шяраваллил кIанттайсса оьрму гьаз баву мурадрай цуку-цукунсса давуртту дуллай буссарив. Жу, билаятрай тIутIи ххяххан баврицIун бавхIусса бикIу, чавахъирттал хозяйстволуцIун бавхIусса бикIу, агьамсса масъалартту гьаз бувару, бартбигьару. Мукунма зунттал районнал маэшат гьаз бувансса чараннаха зий буссару.
Ва давривусса жул хIарачатран кьимат бивщунни Адыгеянал Республикалул хъуниминнал. Адыгейнал халкьуннал бюхттулсса арснал Мурат Кумпиловлул каруннива укун хьхьичIунсса награда ласунсса тIайлабацIу хьунни ттун, бусраврай ва барчаллагьрай кьамул дував ва награда. ПаччахIлугърал орденну, медальлу ттул чансса дакъар, ва наградалия личIинува пахрулий уссара, – увкунни Айгун МахIаммадовлул.
Ванал бувсунни Адыгеянал Республика аьлтта чIалай хьхьичIуннай хьусса республика душиву, шагьрурдай ва шяраваллаву низам душиву, паркирдаву, сквердай, кIичIирттаву гьарзат лазиларкьуну, пар-партIий душиву. ЧIявусса социал объектру буллай бушиву, зунттал районнайгу, арнил кIанттайгу туризм дюхъан дурну душиву. Ххи бунни цува каялувшиву дуллалисса комиссиялул цимилагу гьаз бувшиву Адыгеянал Республикалун агьамшиву дусса масъалартту, ччарча Жяматийсса палаталуву, ччарчагу регионнал форумирттай.
– ЧIири бизнес хъит учин даврил, этно, агро ва дучрал туризмалух ва цаймигу хайр-мюнпат ласун кунмасса иширттах жу мудангу къулагъас дуллай буссару. Жул гьанумур мурад жулла республикарттайсса оьрму сантирай ва лябуккулий хьхьичIунмай хъит учавур, агьалинал маэшат гьаз бавур. Шяраваллил хозяйстволуву, ризкьи ябавриву, балугъирттаха зузавриву, ссаву ци мюнпат бурив, миккун хъит тIутIавур, – увкунни Айгун МахIаммадовлул «Илчилул» корреспондентнахь. Жугу дакIнийхтуну барча т1ий буру Адыгеянал Республикалул ларайсса награда. ЧIа тIий буру цIуллушиву, дуллалимуниву тIайлабацIу!
