Хасъсса аьралий операциялий гьуртту хъанахъисса Ккуллал райондалийсса 2-мур ЦIувкIуллал шяравасса Рамазаннул арс Арсен Рамазанов аьралий иширттаву къучагъшиву ккаккан даврихлу лайкь хьуну ур Жуковлул медальданун ва Аьрасатнал Обороналул министерствалул чулухасса цаймигу наградарттан.
Вай гьантрай Дагъусттаннал ХIукуматрал ванан дуллунни «Дагъусттаннал халкьуннал виричу» тIисса бюхттулсса цIа ва Мусил цIуку.
Арсен Рамазанов цIана СВО-лий уну, цала награда ласун учIанссавагу сант дакъа ур. Мунияту къучагънал награда дулунни ванал буттахьхьун, Рамазаннухьхьун.
Ккуллал райондалул администрациялул хъунама Шамил Рамазановлул къучагънансса награда ва Дагъусттаннал бакIчи Сергей Меликовлул чулухасса Барчаллагьрал чагъар буллай, барчаллагь увкунни ххаллилсса арс тарбия увсса Арсеннул буттахь Рамазаннухь.
– ХIакьинусса кьини Арсеннул ва ч1явусса цаймигу жагьилтурал хасъсса аьралий операциялий къучагъну талай, ккаккан буллай бур цивппа Ватандалийн дакI тIайласса аьралитал бушиву. Ватандалийн кьини дурксса чIумал, Арсен цува хушрай лавгун, чирчуну дур СВО-лий гьуртту хьунсса контракт.
Аьралий операциялий гьуртту хъанахъисса хIаллай, ванал тасттикь бунни цува кьянкьасса низам дусса, вихшала дишин лайкьсса хIаписар ушиву. ХIакьину, Арсенгу ва кунмасса цаймигу бур жула аьрщарайсса паракьатшиву дуруччаврил цIаний нигь-ццах дакъа талай. Вайри уттисса никиран эбратрансса вирттал.
Барчаллагь, оьрмурдан нигьачIаву дунугу, Ватандалул мурадру хьхьичI ххуттай бивхьусса оьрчIан лайкьсса тарбия дуллусса цинявппагу нитти-буттан, – увкунни Шамил Рамазановлул.
Награда дуллалисса мажлисрай гьуртту хьунни СВО-лул гьурттучи, «Память гор» тIисса Ккуллал райондалийсса организациялул хъунама, 2-мур ЦIувкIуллал шяраваллил администрациялул бакIчи Нураттин Рамазанов.
Шиккува кIицI лаган, ванияр хьхьичI «Дагъусттаннал халкьуннал виричу» тIисса цIанин лайкь хьуссия СВО-лий гьуртту хъанахъисса 2-мур ЦIувкIуллал шяравасса Арсеннул маччачу ХIажибутта МахIаммадов.
Жула миллатрал къучагъсса арсру цIуллу баннав, дакIру ххарину зана хьуннав!
