Совет Союзрал Виричув, космонавт Муса Маннаров увсса кьини, мартрал 22-нний, Гъумучиял школалий хьунни миллатрал язисса арснан хас дурсса классный часру.

Бусалардавун агьсса космонавтнал оьрмулиясса ва аьламраву бувтсса манзилданиясса ихтилатру бунни школалул шамилчинмур зивулий бивхьусса Муса Маннаровлул хъамаллурал къатлуву.
Дуклаки оьрчIал дурккуна космонавтнан хас дурсса назмурду, увкуна балайрду. Муса Маннаровлул савлугърансса мероприятияртту хьуна Гъумучиял «Солнышко» детсадрал хъунмур группалувугу. Щала нюжмар шикку ларгуна космонавтнан хас дурну.

Дарсирдай оьрчIру, космонавтнал биографиялущал кIул шаву бакъасса, гъирарай дихьлай бия суратру, датIлай бия ракетартту, ххал дуллай бия планетарттаясса мультфильмру ва космонавтнал оьрмулиясса документал фильм, бувчIлай бия аьламраясса ссигъри, сакин бувну бия «Космодром» тIисса тIуркIу, лахьлай бия аьламраясса шеърирду. Сакин дурну дия аьламраясса суратирттал выставка.

ОьрчIру бувцуна Муса Маннаровлул къатравусса музейравунгу. Музейрал хъунмур Аьби­дат Макаевал ккаккан бувна оьр­чIан космонавтнан хас був­сса экспозицияртту. Миннувух дия аьламраву ларххун диркIсса спортивная куртка, тIивтIусса аьламравун уклакийни ларххун диркIсса катIри, аьламрая бусласисса луттир­ду, Муса Маннаровлул кулпатрал архивравасса суратру.
Ххарисса ва хъамакъабитан­сса асардай зана хьуна оьрчIру космонавтнал музейрава.

Зулайхат Тахакьаева