Июль зурул 22-нний зун байбихьлахьиссар ЦIуссалакрал райондалийсса мурчай электростанция. Ва иширан хас дурсса мероприятиялий гьуртту хьунни Дагъусттаннал бакIчинал чIумуйсса кIанайма Федор Щукин.

– Укунсса проектирдал чIаланну лядуккан дайссар кIанттул экономика, гьаз байссар агьалинал ялапаршиндарал даража. Ва зузи баврийну ххишала хьунтIиссар инсантал зунсса кIанттурду, ххуй хьунтIиссар инфраструктура, чIяру хьунтIиссар налогирттая нанисса арцу, региондалийн кIункIу хьунтIиссар инвестортал.
Му бакъассагу, мурчал энергия марцIсса энергияр, му ишла даврийну жула лагма-ялттусса кIанттурдайн гуж чанну багьлагьиссар, – кIицI лавгунни республикалул бакIчинал.

Ветропаркрал, дянивну хIисав дурну, шинал лажиндарай ссятрай 879 млн. киловатт электроэнергиялул булайссар. Ванил дузал байссар энергиялул 240 азарва къатта – республикалий электроэнергия ишла буллалиминнал сайки 9%. Майданнив дирхьуну дуссар 120 установка. Гьарицаннул гуж – 2,5 МВт. Ца ветроустановкалул лахъшиву дур 50 зиву дусса къатралуксса, кIушиву – 320 тонна.
Проект щаллу дурну дур «Росатом» тIисса паччахIлугърал корпорациялул. Объект къуртал бувну бур кIира шинал, мунияргума чIирисса чIумул дянив.

Андриана Аьбдуллаева