Донбассрал агьалинан кумаг буллалисса фондрал президент Рафи Аьбдул Жабар Дагъусттаннал муфти, щайх АхIмад-хIажи Аьбдуллаевлущал хьунаавкьунни.
«Аьбдулла» тIисса позывной цIа дусса Рафи Донбассрахлусса къизгъинсса талатавриву ччаннацIа хьуну ур, амма дакI гъагъан къаавцIуну, фронтрангу кумаг буллай, аьралийтурангу тарбия дуллай ур. Ванал хъунмасса барчаллагь увкунни Муфтиятрал фронтран ва Аьрасатнал цIусса регионнал агьалинан буллалисса кумаграхлу. ЛичIинува барчаллагь увкунни цIусса регионнайн имамтал тIайла буккаврихлу.Аьрай щавурду дирсса, цIунцIияртту хьусса чиваркI хъин баврийн бувккун, Рафинал бувсунни мукунми дучрай бурттий занази буллалисса Иппотерапиялул центрданул мюнпатрая. Муфтинал му центр бавриву цалвагу бутIа бишинтIишиву бувсунни. МаслихIат бунни мукунмасса ца центр Дагъусттаннайгу тIитIин.
Цаппара гьантрал хьхьичI муфти хьунаавкьуссия ДНР-лул Халкьуннал Мажлисрал депутат, СВО-лул гьурттучи ва машгьурсса спортсмен Владимир Минеевлущалгу. Ваналгу барчаллагь кунни Дагъусттаннал агьалинал ва хасну Муфтиятрал СВО-лун буллалисса кумаграхлу.

ПатIимат Рамазанова