Щамххаллул арс Давудхъал Мирза увссар Лакрал райондалийсса Сундарали тIисса шяраву. Ванал оьрмулул мукьра шин хьусса чIумал, Сундарали бизан бувссар зунттава арандалийн.

Цала шяраву байбихьулул школагу къуртал бувну, дуклай ивкIун ур Гьамиящиял ва ЦIуссалакрал дянивми даражалул школарттай. АцIва класс къуртал бувну махъ увххун ур МахIачкъалаллал музыкалул училищалувун. 1962 шинал мугу къуртал бувну, увххун ур М. Горькийл цIанийсса Литературалул институтравун. Мура шинал Дагъусттаннал луттирду итабакьай идаралул буккан бувну бур «Ссайгъат» тIисса ванал шеърирдал хьхьичIва-хьхьичIсса жуж.
Гания махъ Москавлив, Дагъусттаннай личIи-личIисса мазурдий бувккун бур кьуннийн бивсса луттирду.
Мирзал творчествалуву гьарта-гьарзасса кIану бугьлай бур драматургиялулгу. Лакрал театрдал личIи-личIисса шиннардий ккаккан бувну бур ванал ххюва пьеса.
Оьруснал ва дагъусттаннал мазурдия лакку мазрайн ванал таржума бувну бур тамансса чичултрал произведениярттугу. Миннувух бур А. Пушкиннул, С. Есениннул, А. Твардовскийл, Л. Кассиллул ва Р. ХIамзатовлул произведениярттугу.
Литературалул институт къуртал бувну махъ Мирза зий ивкIссар Дагъусттаннал радиотелевидениялул комитетрай, Дагъусттаннал Чичултрал союзрал лакралмур литературалулсса байсса секретарьну Чичултрал союзрал правлениялул председательнал хъиривчуну. Ванан дуллуссар Дагъусттаннал халкьуннал чичу тIисса бусравсса цIагу.
Мирза ниттил увну бартлаглагисса 80 шинал юбилейгу барча дуллай, чIа тIий буру ванан чIярусса цIуллусса шинну, цIу-цIусса тIайлабацIуртту ва ххуй-хъиншивуртту.

Ттул оьрчIшиву

НякI-кьачIа хъанахъисса
Ссавнилу зунттул бакIрай,
ТIутIаву тIуркIу тIисса,
НузручIий, вин дахIалай.

Вивусса зирангшиву
ХIикматри къаучинна,
Му дур вила оьрчIшиву
Вивура тIуркIу тIисса.

ОьрчIнийсса ттулмур тIуркIу
БяливчIуссар, макI кунма,
ХьхьичIва-хьхьичI ттупал гургу
Архния бавсса чIумал.

Къярз тIисса ярагъуннил
Алгусса ппу, чай бурттий,
Шярава лавгсса кIюрххил
ДялирчIссар ттул оьрчIшиву.

Аьрая чIаххураннин
Маоь бивсса та хьхьуну,
Дуркссар ниттихъал мукьайн
Ттул оьрчIшиву, дярххуну.

Ккашил аз увсса ттунма,
Ниттил инимечI шавхьун,
Букан буллусса чIумал,
Хьуссар оьрчIшиврий щаву.

Буттал хъарасрай цалчин
КIама бивхьусса кьини
Аьнтсса гьухъал кIунтIардийн
КIура дарссар оьрчIшиву.

Аьрай ливчI уссил усру
Ларххукун ттула ччаннайн,
Лерщуссар махъра-махъсса
ОьрчIшиврул яргсса кIалай.

ТIирин бища ххарину,
Нузру чIий, оьрчIшиврувух,
ХIайп, та ттулмур оьрчIшиву
Дакъахьуссар оьрчIнийра.

Ттул хIави

Лухччинул чIан дурцIунни,
ЧIахIа чIапIайх бивчунни,
Агь, ттул чIава хIавилий
ЧIапIивагу къавхьунни.

Къункъу буцIлай, щин дутIлай,
ХIави щюлли къавхьунни,
Ххяллуй щаххуллул къатIа
ТIутIайхгума бивчунни.

Дус ххари анна куну,
Каманча бивщуссия,
КIиссурала цIарх куну,
Дурцун, дагьунни сина.

На махIаттал къахьунна,
КIюрххил лавай ивзукун,
Ттунма ниттил мазгума
Лякъирча хъамабивтун.

Зиризавал дуниял,
Дурача лавмартсса зад,
Цавай давраннай бивтун,
Цавайннан дулара дард…

ЧIахIа чIапIайх бивчунни,
Щаххуллуй тIутIив хьунни,
Ттул тIитIалдарал хIави
Мукъурттил кьакьан бунни.

Хъирив ура уруглай

Ларгунни жагьилшиву,
Мурчал хъаттирдай лерххун,
Паргу куну, бат хьусса
ТIавус лелуххи кунна.

Чансса аглан данна тIий,
Хъирив хъапа тIий уна,
Ца мусил тIимурагу
Риттун къархьунни ттуща.

Тти хIайранну тай гьантрал
Хъирив ура уруглай,
Махъра-махъ нину ларгсса
Ххуллийн ятин оьрчI куна.

Инт къадучIарча

Зунттайн инт къадучIарча,
Ссал ххари банссар ссули,
Ххирамур къабучIарча,
ТIутIал кацI щин булуви?

Ччиссаннун ччисса тIутIи
ТачIавгу къариттунна,
ДикIуча га тIуркIу тIий,
Ххирамур ххари буллай.

Багъравух бур сайр буллай
Щюллисса мурчал щатIив,
ХIаллих хъюлчайтIи дуллай
Ттунна ххирасса тIутIив.

НякI яру, лахъи хIаллу –
Душ багъравун бувкIунни,
Къадурккун ттухь ссихIрагу,
ТIутIив ритлан бивкIунни…

АьтIисса хханссар тIутIив,
Душ ххарину бунугу,
Кьяртая дур кIунтIай тIий
Макь кунма ливцIсса кIунтIру.

Ттул чагъана

Чагъанай, ттул чагъанай,
Ляла ливцIу аьнтIикIай,
Ина байва халкь хIайран
Ци-цигу мажлисирттай.

Вил дюрчIусса ссурссулийх
Ттюнгъану ках чайссия,
КIиссурттала жюржу тIий,
Щаращи хъячайссия.

Гай чIурдал хъювхъулуву
Хъювсулшиву дассайва.
Хъюрухъру чIантIив душгу
ЧIавахьулттийх бургайва.

Ккуру битайхту ккуртта
Пар-пар тIутIисса синттайх,
Уттигу тайва чIурдал
Ках кунни дакIнил тIинттайх.

Так бакъари буруглай
Иттав яшмилул яру,
ДакI дур кIалайлух луглай
КIулщуйн дурксса луххаву.

КIисригу бур къухънану,
КIу хьуну бур ккурттагу,
Аьсив дурксса синттаву
АьтIий дур ца макьангу.

КъатIивтIунни цалвагу
ЧIаххуврал чIавахьулу,
ДакIнил чIалсса леххаву
Дунуккар куклу хьуну.

Чагъанай, ттул чагъанай,
Чуври ттул къудуршиву?
Мурчайн дагьсса чалагъай
Диявав жагьилшиву…

ЦIан дагьунни къатлувун,
Бизаршиврул увцIунна,
Нанула ттул чIу ххуймур,
Ца макьан руциннуча!

Лакку чIу

Зизлай бур дакIнил чIурду
Ттул ялун вил мазрая,
Зизайсса кунна интту
Багъравун тIутIал гъарал.

КьатIув марххала буна
Гъи дайдихьлахьиссарив?
ЛухIи тIутIул чIапIаву
Булбул балай тIиссарив?

Чугурданул синттурив
Ттул къюкI хъазамравусса?
Вил чIугу тазанакрив
Ми зурзу тIутIи дурсса?

КъакIулссия лакку маз
Ваксса пасихIсса бивкIсса,
ДакIнивусса талихIгу,
Дардгу бусан бюхъайсса.

Уча, душ, балай уча,
Ччавриха, хъиншивруха,
Дунияллийх леххуча
Лакку душнил лакку чIу!

Ларгунни шинну

Ларгунни оьрмулул
Язими шинну,
Зунттал мюрш щаращал
Дирисса щинну,
Левщунна инагу,
Левщунна нагу,
Так лирчIунни ччаву,
Лавхъсса чирахъну.
Хьхьирил зумардая
Жамирду кунма,
Жула зумардая
Арх хьунну жува,
Жамирду цимилгу
Зана бивкIунни,
Жулами зумарду
Архна лирчIунни.

Ина бухьунссара
На ур тIий хIазрай,
ХIазирай акъара,
Ура хIасратрай,
Мякьлин мачча хIачIлай,
Ва хIаллайнияр,
Ккашин хьхьути канай,
Вил чIарав ччива.
Лажинни, уссурвал,
Ттул мюрщи ссурвал,
Мабари махсара
Жагьилшиврущал,
Ябара асарду
Зунма язисса,
Цалчин хьусса ччаву
Дурча аьзизсса.

Архсса чаннацIуку

Пюрун кунна някIну
дарусса ссавний
Зунттал кIяла кьяпри
ссавруннайн щуний?
ЧIалай дур ттуруллив –
паммалул гьуртти,
Чуврив архну пперх тIий
ца чанна цIуку.

Мякьний щинах куна
мякьну уруглай,
Ттуруллаву ссахрив
на ура луглай,
Ттул хьхьичIух бур бацIлай
Лакрал зунттурду,
ЧIарату чIюхлай бур
урттул щурщугу.

Дурвав ттуруллан ва
кIа цIукун чIалай
Зунттурдал вив ларсъсса
ттул шяравалу,
КъувтIилух щябивкIсса
кIай ттул уссурвал,
Къурув къуш бивщусса
ххирасса ссурвал?

Ччива кIа ттуруллул
парчану нава
Ххют дурну дустурайн,
дюхлул бан гьава,
Ччива гъарал кIунтIну
ттуруллай ацIан
Щинах мякьсса къурув
рахIматну агьан.

Даиман, даиман,
чув ухьурчангу,
ДакI дикIай хъита тIий
Лакрал зунттачIан,
Архсса билаятрай
ва някIсса хьхьуну
КIайннуя буслай бур
кIа чанна цIуку.