Миллат – маз, маз – миллат, лакку маз – ниттил маз. Нигьа­чIавривун багьлагьисса ниттил мазраяту бур ва махъсса 30-35 шиннардил мутталий нанисса ихтилатру.

Ваниннин ца шанма зурул хьхьичI мува ихтилат хьуна «Инт» кафелуву. Гикку гьур­тту хъанай бия мазрал аьлимтал, «Илчи» кказитрал хъунама редактор Руслан Къардашов, Чичултрал союзрал лакрал секциялул хъунама Супиян Оьмаров, ла­кку мазрал муаьллим ПатIимат Аьлиева, Дагъусттаннал Жяматийсса палаталул хъунаманал хъиривчу Ссапарбаг Аьбдуллаев ва м.ц. Гьуртту хъанахъиминнал лакку мазрай дакI аьтIисса, му нигьачIавривун багьавриясса бия ихтилат. Амма му буруччиншиврул ци дуллан аьркинссарив, цукунсса чаранну лякъин аьркинссарив буслай бакъая…
ПатIимат Аьлиевал увкуна: «На, оьрчIругу бавтIун, ла­кку мазрал дарсру дихьлавияв шагьрулул оьрчIахь, ми батIинсса кIану бакъар», – куну. Микку Ссапарбаг Аьбдуллаевлул: «На булунна мукунсса къатта, щаллу буванна аьркинмунилгу, ттуйнна ласлай ура му даву», – куну, баян бувна.
Буллусса мукъул ва даврил лях манзил кутIасса Ссапарбаглул, бавтIун хъирив гьантрайва му давриву гьурттушинна дувансса дусталгу, дузрайн дуккан дурна даву. Му ишираву ххуйсса гьурттушиннагу, бакI цIуцIавугу дунни Супиян Оьмаровлул. Ваналгу, ПатIимат Аьлиевалгу хIарачатрайну щаллу бувссар гьарица дарс дишаврил кьяйдардал учебникру, чичултрал ва шаэртурал язи-язими луттирду, журналлу, словарьду, кказитру, жула тарихраясса луттирду бу­сса эбратрансса кабинет.
Лакку маз лахьхьаврил центр­данун дирзссар жула хъуна­сса аьлимчу, мазурдил цIанихсса специалист, Халидлул арс Ися Аьбдуллаевлул цIа.
Му дайдихьу хъинчулий ккаклай, ниттил мазрал чIарав бацIайми чIяву хьуншиврийн умудгу бихьлай, барчаллагьрай буру, лакку мазрай дакI цIий, цащава бюхъаймур буллалиминнайн.
Яла бигьамургу, гуж къабагьаймургу – жула ужагърай­сса ихтилат ниттил мазрайсса бикIавур. Му гьарцаннан цайвасса бурж бушиву хъамабитан цукунчIав къабучIиссар..
Миллатрал мазрахсса ччаву базурдаву дакъахьурча, ниттил маз буруччин къашайссар.
Шалласу Шалласуев