Сентябрь зурул дайдихьулий ЧIяйннал Магьирлугърал къатрал хъунмур СалихIат Алхасовал цалчин дуллалисса мероприятие хас дурну дия Дагъусттаннайн ярагъуннищал ххярхсса къачагътурал кьюкьри ххит дурну 25 шин шаврин.

Мероприятиялий гьуртту хьуна дуклаки оьрчIру. СалихIат Алхасовал оьрчIахь балжину бувсуна ЦIуссалакрал райондалийн дунияллул террористътал ххявхсса ппурттуву, цалва оьрмурдан нигьачIаву дунура, къучагъну талай бивкIсса ЦIуссалакрал РОВД-лул зузалтрая. КIицI лавгуна къуллугърал бурж биттур буллай Ватандалул цIаний жанну дуллусса Вирттавран бивкIу бакъашиву.

– 1999 шиналсса дяъвилул иширттал чIявусса баларду бувцуссар инсантурал бакIурдичIан. Республикалийсса тагьар нигьачIисса диркIссар. Гуж ххишаласса боевиктурайн данди бавцIуну, миллатрайн дурксса кьини лахълай, къучагъшиврий жанну дуллуссар ЦIуссалакрал РОВД-лул зузалтрал. «Телевышка» 713,5 метралул лахъазан дуручлай, къизгъинсса талатавриву ккаккан дурсса къучагъшиврухлу ЦIуссалакрал РОВД-лул БППСМ-рал командир, милицанал лейтенант Халид Мурачуевлун ва ЦIуссалакрал РОВД-лул БППСМ-рал взводрал милица, чIивима сержант Мутай Исяевлун аьпалул хьуну махъ Аьрасатнал Вирттаврал цIарду дуллуссар, – увкуна СалихIатлул.
Дуклаки оьрчIал дурккуна вирттавран хас дурсса назмурду.

Имара Саидова