Ларгсса арвахIкьини, МахIачкъалаллал 54-мур школалий, чIявусса бусравсса хъамалгу гьуртту хьуну, лахъа-хъунну кIицI ларгунни Аьрасатнал Халкьуннал цашиврул шинан хас дурсса Дагъусттаннал ва Аьрасатнал миллатирттал культуралул байран.
Шикку гьуртту хьунни ДР-лул Хъаннил союзрал председатель Хасайбат Валиева, МахIачкъала шагьрулул Мажлисрал депутат Елена Кожухина, Расул ХIамзатовлул цIанийсса Национал библиотекалул директорнал хъиривчу МахIаммадрасул МахIаммадрасулов, Мариян Илиясовал цIанийсса «Дараччи» ихIсандалул фондрал президент Гульшан Хасаева, ДГТУ-лул ингилис мазрал кафедралул хъунмур Жанна Абуева, МахIачкъала шагьрулул 26-мур школалул завуч Венера Зульпукьарова, СВО-лул Аьрасатнал цалчинсса Виричунал нину, школалул директор Сапижат Мазаева.
Школалул жанахIраву тIивтIуну бия Дагъусттаннал миллатирттал авадансса тарих, культура, багьу-бизу, аслийсса магьирлугъ аьч дуллалисса майданну. Миллатирттал лаххиялуву дуклаки оьрчIру ва учительтал бия хъамал хьунабакьлай. ОьрчIал ниттихъал дурну дия хьхьичIарасса дукрарду.
Цала-цала программа ккаккан дунни лакрал, даргиял, къумукьнал, нугъайнал, яруссаннал, лазгиял, агъуллал, табасараннал миллатирттал. Ва кьинисса байрандалий тIивтIуну бия оьруснал, узбакIнал, белоруссиянал халкьуннал культуралия ва тарихрая бусласисса майданнугу. Цивппа майданнугу, художествалул программарттугу хIадур дурну дия дуклаки оьрчIал ва преподавательтурал.
Мероприятие дайдихьлай, гьурттучитал барча буллалисса ихтилат бувна Сапижат Исяевнал. Цила ихтилатраву чIурчIав дурна укунсса журалул мероприятиярттай, жагьилсса ник миллатирттал культуращал кIул даву бакъассагу, куннал кунналщалсса дусшиврийсса арардугу цIакь дуллалишиврий.
КIицI лаган, ва школалий мудангу хъуннасса къулагъасрайн лавсун буссар дуклаки оьрчIру патриот зумуну тарбия баврил, Дагъусттаннал, Аьрасатнал культура ва тарих ябаврил масълартту.
– На цалчин бакъара Сапижат Исяевнал каялувшиврийсса школалий дуллалисса мероприятиярттай гьуртту хъанахъисса. Аьрасатнал цIакьшиврул ва кьуватрал гьану гьарицагу заманнай миллатирттал цашиврувур бусса. Халкьуннал цашиврул байран, му хъанай дур миллатирттал дянивсса дусшиврул, куннал кув бугьаврил барашинна. Дагъусттаннал аьрщарай ялапар хъанай бур республика хьхьичIуннай давриву хъунмасса бутIа ххи бувсса цикссагу миллатру. ДакIнийхтуну барчаллагь учин ччай бура республикалул даражалийсса мероприятие дан сиптачину бувксса Сапижат Исяевнахь ва ванил коллективрахь. Ва дуклаки оьрчIал оьрмулуву дакIний личIантIисса мероприятияр, – увкунни Гульшан Хасаевал.
– ХIакьину жун шикку жула оьрчIнийсса шинну дакIнин дагьунни, ххал хьунни жула хьхьичIарасса сянатру, жулва усттартурал дурсса цаннияр ца ххуйсса, цанниха ца хъамадитан дуллалисса эмаратру. Ва жула миллатрал культурар. ДакI ххари хьунни Дагъусттаннал тарих, халкьуннал искусство, балайрду, къавтIавуртту, литература, хаснура миллатирттал чичултрал, шаэртурал творчество кIулсса, гьунар бусса оьрчIру ххал хьуну. Сант дагьну дунура кIицI лаганна, Дагъусттаннал паччахIлугърал технический университет укун гьунар бусса оьрчIру кьамул бан хIадурну бушиву, – увкунни Жанна Абуевал.
– Хъунмасса талихI хьуссар дуклаки оьрчIангу, учительтурангу Сапижат Исяевна кунма, цила даву ххуйну кIулсса пишакар бакIрайн багьаву. Ва магьирсса каялувчи бушиву цал уттигу исват хьунни. Мероприятиялул цачIун бунни авадансса тарих бусса, личIи-личIисса миллатирттал инсантал. Жула халкьуннал гужгу цашиврувур бусса. Му хъиннува исват хьунни махъсса ппурттуву Дагъусттаннал халкьуннайн кьини дурксса чIумал, чIарав бацIлай, кумаграл ка тIитIлай бивкIсса хIат-хIисав дакъасса инсантурал узданшиврийну, – увкунни Елена Кожухинал.
Ахирданий Сапижат Исяевнал барчаллагь увкунни мероприятие хIадур дуллай бивкIсса дуклаки оьрчIахь, учительтурахь ва гьарица дуллалисса давриву кабакьу буллалисса нитти-буттахь ва цинявппагу хъамаллурахь.
Имара Саидова
