Октябрьданул 14-нний МахIачкъалалив хьунни ДР-лул Халкьуннал Мажлисрал сессия. Му тIивтIунни ДР-лул парламентрал председатель Заур Аскендеровлул.
Сессиялул регламент кьамул дурну махъ АьФ-лул Президентнал СКФО-лийсса вакил Юрий Чайкал дурккунни Аьрасатнал Президентнал Представление. Сессиялий гьуртту хьунни сенатортал, ПаччахIлугърал Думалул депутатътал.
ДР-лул Халкьуннал Мажлисрал депутатътурал хьхьичI Республикалул БакIчинал къуллугърайнсса кандидатътал хIисаврай ихтилатру бунни Дагъусттаннал Избиркомрал член Самир Аьбдулхаликьовлул, ДР-лул ХМ-рал председательнал хъиривчу Камил Давдиевлул ва цIана ДР-лул БакIчинал буржру чIумуйну бартбигьлагьима Сергей Меликовлул. Циняв кандидатътурал бувсунни цалла программарттая.
Яла депутатътурал кьюлтIну чIурду буллунни кандидатътурахлу.
Буллусса чIурдал хIасиллу укунсса хьунни: 87 депутатнава 82-ннал буллунни Сергей Меликовлухлу.
–ДР-лул БакIчинал къуллугърай ацIлай, ттун бувчIлай бур нава ва тарихрал ца бутIану хъанахъишиву, хъинну чIалай дур нара хъуннасса жаваблувшиву ттуйнна ласлай ушиву жула халкьуннал хьхьичI. Ттула буржну ккалли буллай ура ттущава республикалун шаймур буван, – кунни Сергей Меликовлул цува Дагъусттаннал БакIчину увчIуну махъ.
Ванал барчаллагь кунни цахлува чIурду буллусса депутатътурахь.
Юрий Чайкал барча бунни Сергей Меликовлул къуллугъ.
– Ина ДР-лул БакIчинал буржру бартбигьлагьиссаксса хIаллай куртIну лархьхьуссар региондалийсса тагьар, хIала-гьурттуну зий ивкIссара исполнител властьрал органнащал ва цаймигу идарарттащал, вин кIулссар чув ци дан аьркинссарив. ДакI дарцIуну ура вища бюхъантIишиврий цинявппагу хьхьичI бавцIусса масъалартту дузал буван, – кунни Юрий Чайкал.
Республикалул БакIчи къуллугърай ацIаврил шадлугърал церемониялий гьуртту хьунни Къабардин-Балкьарнал БакIчи Казбек Коков, Чачан Республикалул БакIчи Рамзан Кьадиров, Къарачай-Чаргаснал БакIчи Рашид Темрезов ва Ухссавнил АьсатIиннал БакIчи Сергей Меняйло.
Къуллугърай ацIайни Дагъусттан Республикалул БакIчи Сергей Меликовлул буллунни лахъа-хъунсса хъа:
– На хъа буллай ура Дагъусттаннал халкьуннал хьхьичI буручлан Аьрасатнал Федерациялул Конституция, федерал законну, Дагъусттан Республикалул Конституция ва Дагъусттаннал законну, хIурматрай ядан ва дуручлан инсаннал ва гражданиннал тархъаншиву, Дагъусттан Республикалул цашиву ва щаллушиву, дакI тIайлану бартбигьлан ттуйва бивхьусса Дагъусттан Республикалул БакIчинал лавайсса даражалул буржру.
Региондалул БакIчину Сергей Меликов увчIаврихлу чIурду буллунни
![](https://ilchi.info/wp-content/uploads/sites/11/sites/11/2021/10/melikov_vybory.jpg)