Декабрьданул 9-нний МахIачкъалалив байбивхьунни «Региональные СМИ в условиях новой цифровой реальности: векторы развития» тIисса медиафорум.
Мукунна форумрал лагрулий най дур «Тарки-Тау» цIанилу Аьрасатнал миллатрал луттирдал цалчинмур фестиваль ва луттирдал ярмукIа. Му сакин дурну дур ДР-лул Информациялул ва печатьрал министерствалул. Медиафорумрай гьуртту хьунни Дагъусттаннал БакIчи Сергей Меликов, ДР-лул информациялул ва печатьрал министр УмархIусман ХIажиев, ТАСС-рал гендиректорнал цалчинма хъиривчу Михаил Калмыков, Аьрасатнал Луттирду буккан байсса ассоциациялул Президент Константин Чеченев, Аьрасатнал Чичултрал союзрал правлениялул председатель Николай Иванов.
Сергей Меликовлул тIимунийну, Дагъусттан хъанай бур культуралул ва дуккаврил центрну. ХIакьину республикалий зий бур чIявумиллатру бусса журналистътурал корпус, кказитру ва журналлу буклай бур 14 мазрай. Республикалул каялувчинал чIа кунни форумрал гьурттучитуран хъин-хъинсса мастер-классру, дискуссияртту ва хьхьичIунсса даву. УмархIусман ХIажиевлул цинявннахь барчаллагь кунни форумрай гьуртту шаврихлу, бувсунни площадкарттай бикIан тIий бушиву чIявусса хIаз бизансса, мюнпатрансса ихтилатру.
Махъру лавхъунни мукунма Москавлия бувкIсса хъамаллуралгу.
ДакIнийн бутанну, форумрал даву лахъи лагантIишиву декабрьданул 9-11-ннийнин «Россия – ттул тарихри» тIисса паркраву.
