Май зурул 6-нний МахIачкъалаливсса Буйнакскийл цIанийсса кIичIираву, тIутIал хъунисса чIапри, кацIри кIунттихьсса агьалинал чIявушиврул архниява чIалай бия хъуннасса мероприятие душиву. Дагъусттаннал агьали бавтIун бия республикалул язисса арс, политикалул ва жяматийсса ишккакку Сиражуттин Илиясов каялувчину зий ивкIсса Миллатрал банкрал чIирай ванал цIа чирчусса мармарчарил ула тIитIин.
Мероприятиялул дайдихьу дуллалисса махъ лахълай, Миллатрал банкрал управляющий Идрисов Мурадлул кIицI лавгуна, Сиражуттин Илиясов кунасса инсан жуятува лагаву гьарцагу дагъусттанчувра тIисса инсаннансса хъуннасса кьурчIишиву хьушиву ва Дагъусттаннал политикалуву бикIу, экономикалуву бикIу, ххаллилсса финансист, каялувчи, аьлимчу хIисаврай ванал дурмунил кьимат лахъсса бушиву. Сиражуттин Илиясовлул цIа дусса мармарчарил улттуя пардав дуркьуна МахIачкъала шагьрулул мэр Юсуп Умавовлул ва МахIачкъала шагьрулул Депутатътурал мажлисрал председатель Марис Илиясовлул.
Юсуп Умавовлул кIицI лавгуна, билаятран къабигьасса ппурттуву Сиражуттин Илиясовлул Дагъусттан республикалул ва хасну МахIачкъалаллал социал-экономика аьлтта чIаланну хъит учин давриву хъунмасса бутIа бивхьушиву. Мэрну зузисса ппурттуву ванал лавайсса даражалийн гьаз дуршиву шагьрулул инфраструктура, строительствалул, промышленностьрал давуртту.
БавтIцириннал Илиясов дакIнин утлатисса личIи-личIисса журалул ихтилатру бувна. Масалдаран, республикалул ХIукуматрал хъунаманал хъиривчуну зий ивкIсса Низами Казиевлул бувсуна, бюхттулсса даражалул пишакар хIисаврай хIакьинугу ванал цIа хIурматрай дакъа зумух къаласайшиву. Даврил мухIлу-хIин ххуйну кIулсса, дуллалимур чIумуй дюрхъуну дувайсса профессионал хIисаврай МахIачкъала шагьрулул исполкомрал председательну увчIуну ивкIшиву ва ванал каялувчинал гьунар, бюхъу-бажар личIинува яргну ялун ливчушиву ва Дагъусттаннал Национал банкрал хъунаману зузисса чIумал. Республикалул Халкьуннал Мажлисрал хъунаманал хъиривчу Камил Давдиевлул кIицI лавгуна Сиражуттин Илиясов яла захIматми-жапами давуртту бакIрайнласу бувсса каялувчи ивкIшиву, ванал республикалул агьалинал оьрму хьхьичIунмай шавриву хъунмасса бутIа бивхьушиву Верховный Советрал Президиумрал членну, Халкьуннал мажлисрал депутатну, ПаччахIлугърал Советрал членну зузисса ппурттувугу. КIицI лавгуна ванал даву гихуннайгу бюхъу буну, лайкьсса даражалий дачин дурну бушиву арсругу.
Республикалул Хъунисриннал советрал председатель Ибрагьим Ибрагьимовлул бувсуна Сиражуттин Илиясов тарихрал кьимат бусса инсан ивкIшиву, гьамин тарихрал хIурмат бунутIий Лаккуй гьайкаллу дацIан дуван ва цаймигу агьамшиву дусса давуртту дуван сиптачигу хьуну, бакIуйнгу дуккан дуршиву. ЧIярусса шиннардий ванащал зий ивкIсса аьлимчу, профессор АьбдурахIман Халиловлул бувсуна Сиражуттин Илиясовлул биялсса захIмат бивхьушиву финансирттал система дюхъан дуван, цала кIулшивуртту, бюхъу, опыт агьалинан хайр-мюнпатну ишла буллай. «Ва дакIнин утан чIявусса агьлу батIаврилгу барашин дуллалиссар Сиражуттин МахIаммадовичлул хIурмат лахъсса бушиву. Ва ия гражданиннал кьянкьасса позиция бусса, оьрмугу, инсанталгу ххирасса, дакIнил сахаватсса инсан. ХьхьичIун урувгсса, ххаллил акъасса, инсантуран хъинмур буван чялиш увкнувасса. Ванал хIурмат хъунмасса бия архIал зий бивкIминнал ва кIулцириннал дянив. Сиражуттин МахIаммадовичлул чаннасса цIа личIантIиссар дагъусттанлувтурал дакIурдиву», – увкуна ванал.
Сиражуттиннул даврил ва оьрмулул ххуллун лахъсса кьимат бивщуна Аьрасатнал халкьуннал артист Айгум Айгумовлул.
Мачча-гъанцириннал цIанияту бавтIцириннахь барчаллагь тIутIисса махъ лахълай, жяматийсса ишккакку Рапи Абакаровлул бувсуна ванал вихшаласса чул бищай ттарцIну бивкIшиву кулпат, чаннасса пикрирду, уздансса хасиятру дусса, аьчухсса, ка тIиртIусса Мариян. «Хъамал ххирасса вайннал ужагърай тачIав бухху-букку чан къашайва, ниттил ва буттал ххуй-ххуйсса хасиятру ирсирай дирсса бур вайннал наслугу. Сиражуттиннул тачIав дакIния къалагайсса асарду кьабивтссар архIал зузиминнал, дустурал, гъан-маччаминнал дакIурдиву бакъагу, цал-бунугу цащалва щябивкIсса, ихтилат бувсса инсантурал дакIурдивугу», – увкуна ванал. Бувсуна Сиражуттин Илиясовлул лакрал шаннагу райондалул оьрмулия ва агьалиная бусласисса ххуйсса луттирду итабавкьушивугу.
Мероприятие къуртал хьуну мукьахгу ппив къахъанай бия бавтIцири. Мармарчарил улттуя уруглагисса Сиражуттин Илиясовлул чаннасса сипатрай аьч хъанай дия ванал дакIнил хъиншиву ва пикрирдал марцIшиву. Утти ва мудангу шагьрулул агьулданух, Буйнакскийл цIанийсса кучалийх нанинах уруглантIиссар чанипарну.
ПатIимат Рамазанова
