Вай гьантрай МахIачкъалалив, Р. ХIамзатовлул цIанийсса библиотекалуву лахъа-хъунну хьунни «На къутаннай увссара» ва «Перевал Лахъазан» тIисса Жавраил Хачилаевлул луттирдал презентация. Шикку гьуртту хьун бувкIун бия личIи-личIисса министерстварттал ва ведомстварттал, дуккаврил идарарттал ва жяматийсса организациярттал вакилтал, Жавраиллул дустал, гъан-маччами, цинявппагу Хачилаевхъал кулпат ххирами, миннал хIурмат буми.
Бачин бувну ия мажлис Дагъусттаннал Чичултрал союзрал лакрал секциялул каялувчи Супиян Оьмаров.
Мажлис тIитIлай ихтилат бунни ванил сиптачи ва сакиншинначи Дагъусттаннал халкьуннал чичу, Хизри Илиясовлул. Ванал кутIану бувсунни Заннал гьарица чулухасса гьунар буллусса Хачилаевхъал кулпатрая, миллатрал язисса арсру МахIаммадлул ва Надиршагьлул цала кутIасса оьрмулул ххуллий жяматрал ва политикалул иширттаву дурсса ххаллилсса давурттая, спортрал ва творчестволул ххуллийсса ккаккиярттая. ЛяличIинува кIицI лавгунни Дагъусттаннайгу, Дагъусттаннал кьатIувгу паракьатшиву ликкаврил, дяъвилул ишру бацIан баврил цIаний вайннал багьа бищун къашайсса даву дуршиву. Ванал мукуна дакIнийн увтунни ххюйла каратэлул СССР-нул чемпион хьусса, Ккавкказуллал Брюсли тIий цIа дурксса чIивима уссу Адам.
Жунма кIулссар уссурвал Хачилаевхъул танисса цинявппа жагьилтурал кумиртал бивкIшиву. Жавраилгу вайва мархраясса варисри. Оьтту-ттурчIавухва гьунар буллусса, гьарица чулуха итххявхсса. Ва уссия МахIачкъала шагьрулул мажлисрал председательнал хъиривчувну, ЕСЭР-нул (Европейский союз экономического развития) Ухссавнил Ккавкказнавусса вакилну, Дагъусттаннал ХIукуматрал председательнал маслихIатчину. Сайки 20 шин дурссар Жавраиллул Аьрасатнал дакьаву дуруччаврил комитетрал Дагъусттаннал отделениелий каялувшиву дуллай. Ванал сипталий хьуссар ахIвал кIюласса кулпатирттан кумагру буллалисса цикссагу чирилул акцияртту. Дакьаву дуруччаврил цIаний дуллалисса давурттахлу ва дайкь хьуссар Аьрасатнал Дакьаврил фондрал чулухасса мусил медальданун. Жавраил каратэлул ЛухIи поясрал заллугу хъанахъиссар.
Хъирив хьунни Жавраиллул луттирдаясса, вайннун лавайсса кьимат бишлашисса ихтилатру. ДакIнийн бивчунни Хачилавхъал кулпатрал бакI дургьусса, захIматрал сасан увсса зунтталчув, ххаллилсса тарбиячи, аксакал МухIад, ччяни дунияллия лавгсса уссурвал.
Ихтилатру бунни «Дагестан» ГТРК-лул председательнал хъиривчув Салам Хавчаевлул, Дагъусттаннал Халкьуннал Мажлисрал депутат Марат Илиясовлул, Дагъусттаннал Шяраваллил хозяйстволул академиялул ректор Зайдин Жамбулатовлул, М. Илиясовал цIанийсса ихIсандалул фондрал президент Гульшан Хасаевал, Культуралул министрнал маслихIатчи МахIаммад Сунгъуровлул, профессор Жанна Абуевал, лакку мазрайсса «ЧIавалачин» журналданул редактор Сиянат ХIажиевал, шаэр Алексей ХIажиевлул, одноклассниктал Андриана Аьбдуллаевал ва Аьбдулкьадир Оьмаровлул, Дагъусттаннал Жяматийсса палаталул член Вагьаб Казибековлул, тарихрал элмурдал кандидат Аьвдуссалан Магьдиевлул ва м.ц.
Цинявппагу ихтилатчитурал лавайсса кьимат бивщунни Жавраиллул кутIа хавардан, кIицI лавгунни ми хъинну усттарну чивчуну бушиву, ца-кIива ххуттайну ванаща куртIну, яргну аьч дан бювхъуну бушиву геройнал сипат, ганал хасият, тIул-тIабиаьт. Ванал хаварду лащан буллай бия Чеховлул, Зощенкол хавардаха.
Жавраиллул хаварду бур дакIнива нанисса, бюххансса. Маз бур авадансса, цIу бусса. Авторнан хIисав хъанай бур ва ялун личин буллай ур геройнаву яла куртIмургу, буслай ур оьрмулул дарсну хьусса иширттая, зунттаву ларгсса цала оьрчIшиврия, зунттал халкьуннал яхI-къириятрал кьанунная. Бур ттизаманнул обществолиясса щугълурдугу, бучIантIимунийсса дакI цIуцIавугу. Аьч хъанай бур илданийх цIа ларгсса хъуними уссурваврая жунма къакIулну, къабавну бивкIмургу, тIитIлай дур авторнал цаламур дуниялгу.
Ахирданий Жавраиллул дакIнийхтуну барчаллагь увкунни цала кьини хъун дан, чIарав бацIан бувкIсса цинявннахь. Бахшиш бунни автографращалсса луттирду.
Андриана
Аьбдуллаева
