Республикалул шагьрурдал ва районнал идарарттал зузалт чялишну гьуртту хьунни ларгсса ххуллункьини дуллай бивкIсса субботникрай. Дунни субботник Ккуллал райондалул шяраваллавугу.
Райцентрданий, Ваччав, дуллалисса субботникрай гьуртту хьунни райондалул Культуралул къатрал хъунмур Марина Ибрагьимовал каялувшиндаралусса зузалт. Вайннал лази-лакьи бунни Культуралул идаралул лагма-ялттусса кIанттурду, кIяла бунни мурхьру, бордюрду.
Социал къуллугърал центрданул зузалтрал, ччюрклицIа марцI бувну, низамрайн бувцунни КЦСОН-далул идаралул лагма-ялттусса кIанттурду. Мукунма, цинявппа ялтту бувккун, марцI буккан бунни шяравусса ххуллурду.
Хьунни укуннасса субботник СунбатIливгу. Республикалий субботник дан баян бувну бивкIсса бигьалагай кьинирдай, махъун къабагьну, учительталгу, дуклаки оьрчIругу цахьуну, марцI дунни СунбатIуллал школалул хIаят ва лагма-ялттусса кIанттурду. Шиккува кIицI лаган, СунбатIуллал школалий ччя-ччяни дайссар тIабиаьт дуруччаврил цIанийсса субботникру ва экологиялул акцияртту.
СубботникрацIун дархIуну ххуйсса давуртту дунни ЧIяйннал шяравугу. МарцI дунни Совет Союзрал Виричу ЦIаххай Маккаевлул ва Буттал кIанттул цIанийсса Хъун дяъвилий жанну дуллусса учительтурансса гьайкаллу.
Субботникрай гьуртту хьусса зузалтрахь барчаллагь увкунни Ккуллал райондалул администрациялул бакIчи Шамил Рамазановлул.
Райондалий найнна дикIантIиссар Ххувшаврил 80 шинал юбилейран хас дурсса субботникру.
