Июньдалул 14-нний МахIачкъалалив, Р. ХIамзатовлул проспектрай, хьунни Аьрасатнал Федерациялул ва Дагъусттан Республикалул паччахIлугърал ва политикалул ишккакку, Дагъу­сттан Республикалул ПаччахIлугърал Советрал Бусравсса Председатель МахIаммадов МахIаммадаьли МахIаммадлул арснан гьайкал тIитIлатIисса батIаву.

Шикку гьурттушинна дунни МахIаммадаьлил арс, Аьрасатнал Федерациялул Президентнал Администрациялул каялувчинал хъиривчув МахIаммадссалам МахIаммадовлул, Аьрасатнал Федерациялул СКФО-райсса полпред Юрий Чайкал, Дагъусттан Республикалул бакIчи Сергей Меликовлул, «Фонд развития территорий» компаниялул попечитель советрал председатель Сергей Степашиннул, Дагъусттан Республикалул Халкьу­ннал Мажлисрал председатель Заур Аскендеровлул, сенатор Илияс Умахановлул ва чIявусса цаймигу хъамаллуврал ва къуллугъчитурал.
Гьайкал тIиртIунни Юрий Чайкал, Сергей Меликовлул ва Ма­хIаммадссалам МахIамма­довлул.
Юрий Чайкал дурккунни Владимир Путиннул чулухасса адрес:
«МахIаммадаьли МахIаммадовлул щалвагу оьрму цIакьну бавхIуну бия ДагъусттаннацIун. Шикку ванал бивтун бур захIматрал хъунмасса ххуллу. Ва чара бакъа кIицI лаган ччива, Ухссавнил Ккавкказуллангу, щалва Аьрасатнангу захIматсса чIумал, ванал ккаккан дурсса чувшиву ва кьянкьашиву, республикалийсса нахIушиву, дакьаву цIакь давриву, билаятрал цалийшиву, щаллушиву дуруччавриву ванал бивхьусса хъунмасса бутIа. Цилла лишан, хIисав-сан дуссар укун агьамсса юбилейрал даталул чIумал МахIаммадаьли МахIаммадовлун гьайкал тIитIлатIаврилгу – гьунар бусса, гьарцагу чулуха итххявхсса, лахIан буван къашайсса биялалул заллусса инсаннан, хIакьсса патриотнан ва гражданиннан. МахIаммадаьли МахIаммадовлул аьпа жу­лла дакIурдиву мудангу личIантIиссар», – тIий ур билаятрал Президент.
МахIаммадаьли МахIаммадовлул бивхьусса хъунмасса захIматран, билаятрал, республикалул оьрмулуву ванал бувгьусса кIанттун хас бувсса, ванал бивтсса политикнал ва гражданиннал бигьа бакъасса ххуллиясса ва мунащал хасну цувагу кIулну икIаврицIун дархIусса дакIнин бичавурттаясса бия Сергей Меликовлул ихтилат.
– МахIаммадаьли МахIаммадовлун цинияргу хьхьичIунну бикIайва Дагъусттаннал ва Аьрасатнал мурадру. Мунан кIула цалла кьянкьашиву, яхI чIалачIи буван, аьркинний дя (баланс) лякъингу. Мунаща шайва талатаву къадурна ххув хьунгу, бяст къабувна цама вих увангу, – увкунни региондалул бакIчинал.
Сергей Степашиннул бувсунни Дагъусттаннан ва билаятран захIматсса шиннардий ПаччахIлугърал Советрал Председательну ивкIсса МахIаммадаьли МахIаммадовлул дуллай ивкIсса давурттая, вайннувух цащалла архIал щаллу дуллай ивкIминнуягу. Бувсунни МахIачкъалаливсса «Динамо» стадиондалун дизантIишиву МахIаммадаьли МахIаммадовлул цIа.
МахIаммадссалам МахIамма­довлул цалвамур ихтилатраву барчаллагь увкунни буттаясса аьпа ябуллалиминнахь, чIурчIав дунни мемориалданийсса ттугълий цIувцIусса мукъурттий: «На пахрулий ура нава дагъусттанлув ушиврия. ЧIяву миллатирттая сакин хьусса Дагъусттаннал халкь ттун ххирар Бюхттулсса Аьрасатнал вив» тIисса.
– Вай бия МахIаммадаьли МахIаммадовлул оьрмулул формулану хъанахъисса махъру. Умуд бур вай махъру ккалаккисса жагьилтуран хъиннува ххуйну асар хъананссар цуксса лавайсса ва бусравсса буржрив дагъусттанчувну икIаву, – увкуна ванал. Ихтилатирттая махъ цинявнналагу архIал гьайкалдануцI тIутIив дирхьуна.

Бадрижамал Аьлиева