Ларгсса итникьини МахIач­къалалив, Редукторный поселокрай Аьрасатнал Виричу МахIаммад Исбакиевлул суратгу, цIагу дусса мармарчарил ула цIакь дунни ванал нитти-буттал къатрайсса чIирай. Виричу дакIнин утан бавтIун бия чIявусса агьлу. Гапцахская кIичIиравалу тIутIавун бахьлавгун бия.

Улттуя пардав дуркьуна МахIач­къалаллал мэр Жамбулат Салавовлул ва Виричунал ниттил Марина Исбакиевал.
Жамбулат Салавовлул кIицI лавгуна МахIаммад Исбакиев цува дунияллия гьаннийн аьраличунал буржирайн дакI тIайлану ивкIшиву ва ванал оьр­му чувшиврул, къириятрал ва Ватандалухсса ччаврил эбратну хъанахъишиву. ЛичIинува барчаллагь увкуна ванал Виричунал ниттихь, ххаллилсса арс, хIакьсса патриот ва аслийсса аьра­личу тарбия уваврихлу.
«Жулва буржри МахIа­ммадлул аьпа хIурматрай ябуллан, ялун нанисса никирахь ванал виричусса оьрмулул ххуллия буслан. Ватандалул мурадру буруччаву – чIявусса миллатру бавкьуну яхъанахъисса Аьрасатнал агьалинал аьмсса буржри. Ватандалухлу цIакьну бавцIусса Вирттал къабуккайссар жула дакIурдива», – увкунни ванал.
МахIачкъалаллал Депутатътурал Мажлисрал хъунама Хиби Аьлиевлулгу кIицI лавгунни, МахIаммад Исбакиевлул оьрму чувшиврул дарсну хьунсса бушиву.
Шяраваллил хозяйствалул ва продовольствиялул министрнал хъиривчу Шамиль Жамаловлул бувсунни цана МахIаммад ххуйну кIулну ивкIшиву, шиннардих къаурувгун аькьлулул увччусса, дири-кьирисса оьрчI ивкIшиву.
«Аьрасатнаву ца МахIаммад Исбакиев акъа цама Виричу акъассар, гьамин аьралий гьалмахчунал Аьрасатнал президент Владимир Путиннухь дуснал гьунардания бувсун, Виричунал цIа дизан тавакъю був­сса. Укун аьралий гьалмахтурал дянив бусравну ушиврулгу исват буллалиссар МахIаммад чувшиву ххисса, къирият дусса ивкIшиву», – увкунни ванал.
Марина Исбакиевал барчаллагь увкунни арснал цIанил хIурмат буну бувкIцириннахь. «Ттун арс сагънувари усса. Жува ва дакIний буссаксса, ваная буслай, ванал цIа абад дансса ххуллийссса давуртту дуллай буссаксса МахIаммад уттавассар», – увкунни ванил.
Мероприятие къуртал дунни мармарчарил ула дусса чIирацI тIутIив дишаврийну.
«Гьарца чIумул мяйжаннугу цила ялун личин бувайссар вирттал. Виричушиврий жанну харж дурсса тамансса лакрал вирттаврал ккаккан дунни дагьайкунсса къучагъшиву, дакIнийхтуну Ватан ххирашиву. Вайннавух хIурматрай кIицI лагару Исбакиев МахIаммадлулмур цIагу. Укунсса жагьилтурал гьунардан бивкIу бакъассар. Митинграй гьуртту хьун чIявусса агьали бавтIун бур, вагу вирттаврал аьпалул хIурмат лахъсса бушиврул барашиннар. ТачIаввагу бигьану къабикIай кунсса мероприятиярттай гьуртту хьун, ниттихъащал, гъан-маччаминнащал гъалгъа тIун. Вайннал дакIурдивусса къумашиврул ва къювулул дазу дакъар. Вайннул дакIру рахIат дан кунмасса махъругу ляхълан къабикIай. Ниттихьхьун, Марина Исбакиевахьхьун цIуллушиву дулуннав, Виричунал душнил оьрму талихIсса хьуннав», – тIий бур митинграй гьуртту хьусса Гульшан Хасаева, Мариян Илиясовал цIанийсса «Дараччи» фондрал хъунмур.
ДакIнин бутанну, 2024 шинал июньдалул 14-нний Аьрасатнал президент Владимир Путиннул «Вирттаврал чIун» тIисса программалул гьурттучитуращалсса хьунабакьаврий майор Денис Диденкол аьралий гьалмахчунал гьунарданиягу бувсун, му дунияллия лавгун махъ Виричунан цIанин ккаккан увара тIисса тавакъю бувшиву. Ванал кIицI лавгуна, цува кIусса щавурду дирну ухьурчагу, МахIаммадлул группалийсса каялувшиву къакьариртушиву. Агьамсса аьралий масъалагу барт бивгьушиву жандалий хIайп къакуну. Президентнал кутIану жаваб дуллуна Диденкохьхьун. Ноябрьданул 25-нний вара шинал МахIаммад Исбакиевлун Аьрасатнал Виричунал цIа дуллуссия.
Цал уттигу дакIнин бутанну Виричунал ппу Гергебильский райондалийсса Аймаки тIисса шяравасса ушиву (шиккугу дуссар ванансса гьайкал), нину ЧукIнатусса. ЧукIнавгу абад бувссар Виричунал аьпа. Му бакъассагу, гьашину Ххувшаврил байрандалул хьхьичI гьантрай Каспийскалийсса Вирттаврал Аллеялий бацIан бувссар МахIаммад Исбакиевлул бюст.МахIачкъалалив , МахIаммад Исбакиевлул цIанийсса, 620 оьрчIансса цIусса 62-мур школа тIитIин хIадур хъанай буссар «Ветеран» микрорайондалий.
Гьай-гьай, цукунчIавсса бюстирдал, гьайкаллал ва мармарчарил улттал ва ссалчIав Марина Исбакиева кунма, барххулт кунма бювхъусса, итххявхсса арурваврацIа хьусса ниттихъал къюву лагь къадувайссар. Амма чувшиврий цIаравун ххявхсса вирттаврал цIарду жула дакIурдивугу, тарихравугу личIантIиссар.