Хъаннил байрандалул гьантрай МахIачкъалаллал администрациялул Машлул, рекламалул ва муштаритурал хIаллихшиндарал управлениялул вакилтал СВО-лий жан дуллусса Асхад ХIажиевлул нину Саният ХIажиевачIан шаппай бивсса ппурттуву, вайннал къулагъас дурну дур Вирттаврал цIарду чирчусса мармарчарил ултти къатрал дачIрасса лажинчIирайн лархъун душиву, яъни ялтту къахIулувхIусса калпуширттал чIирайн.
Вирттаврал ултти учаву бувчIин буван, дакIнин бутанну Саниятлул лявма арс Исламлулгу хьхьиривун бюкьлакьисса инсантал ххассал буллай кьура шинал оьрмулуву жан харж дуршиву. КIицI лавгсса управлениялул хъунама специалист Аьбдулзагир Бийболатовлул, МахIачкъалаллал мэр Жамбулат Салавовлущалгу маслихIат ккавккун, уссурваврал цIарду чирчусса мармарчарил ултти дусса лажинчIира бакьин бувну, фасад ххуйсса даражалийн дуцин махъ буллуссия.
Вана утти буллусса махъгу бацIан бувну, Саниятлул къатрал фасадгу дакьин дурну, Ххувшаврил байрандалул гьантрай цIунилгу ваничIан тIутIащал бувкIун администрациялул вакилтал.
«Вил хъунама арснал Асхадлул, Дагъусттаннал университетрал худграф къуртал буварчагу, Ватан дуруччайсса аьралийчунал пиша язи бувгьунни, гьалмахтал ххассал буллай Харьковрал областьрай жан дуллунни интту 2022 шинал. Хъиривма арснал Исламлулгу гьалаксса хьхьирил щатIавун ххявххун ца инсан ххассал увну, гама ххассал уллай унува чувшиврий жан дуллунни. Укунсса жагьилталгу, вайннал гьунардугу жунма хъама къабитантIиссар. Укун виртталсса арсру тарбия бувсса ниттихъал хIурматгу жучIава лахъну бикIантIиссар», – увкунни Бийболатовлул.
«ЦIусса къатри дуллай байбивхьуссия ттул хъуними арсру. Амма вайннан, вай къатри дурну къуртал дурну, царагу хьхьу рутан кьисмат къавхьуна. Жагьилсса арсурваврал мина хьуна цивппа ляхъан бувсса ЗанначIа. МахIачкъалаллал мэр Жамбулат Салавовлул каялувшиндарайну фасадрал чIалачIин ххуйсса даражалийн дурцунни. Ттул ка хъирив лаллай дакъая вайннулсса буллан, хъатру дагьаврия нигьгу дия. Къабивтунни дакIцIуцIаву дусса чиваркIуннал вай чIиртту ялгъуз-гъаривну. ДакI дарцIуну бура ттула арсурваврал рухIру ххари хъанай душиврий, укунсса аякьа чIалай, цащара къуртал дан къархьусса давуртту дуршиву асар хъанай. МахIачкъалаллал администрациялул, хаснува Машлул ва рекламалул управлениялул вакилтал аякьалий ттул чIарав бацIай мудангу. Байрандалул гьантрай ичIунмай бувкIун, барча бувара, бучIансса сант дакъанийгу, оьвкуну, барча бувара. Управлениялул хъунама Устарбеков Юсупбек, ванал хъиривми МахIаммадов Оьмар, Аьбдулзагир Бийболатов цимилагу хьуссар жучIа ичIува. На барчаллагьрай бура ттухрасса ва нава кунмасса ниттихъахсса, кулпатирттахсса къулагъасрахлу. Хаснува байрандалул гьантрай жуву язисса арсурваврацIа хьусса къумашиву цIунил цIулаглан дикIай, укун дакIцIуцIаврий щавуй ка дишин хьхьичIунмай хьуминнал аякьа асаргу, бусравгу шай. СВО-лийсса оьрчIругу цIуллуну шаппай бувкIун ккакканнав», – увкунни Саният ХIажиевалгу.
Ванил ятIусса калпуширттал чIирайн лархъсса улттацI (вай кIира дур, ца шагьрулул администрациялул, цагу арснал гьалмахтурал дурсса) ччя-ччяни тIутIив дишай. Цуксса ххуйсса кацIру биширчангу, къахIулувхIусса чIирттал чIалачIин магъмунну чIалан дикIайва. Утти Вирттал буруглай буссар исвагьийсса чIирая кIичIиравух нанинахгу, ниттихгу, цувалу ливчIсса чIивима уссихгу, ужагърайн бухха-буккайнахгу. Дазу дакъасса барчаллагьри ниттил дакI чанссарагу аьчух дуккансса ва даву дурцириннайн.
ПатIимат Рамазанова
