[dropcap]М[/dropcap]ай зурул 24-нний Ккуллал райондалийн ларчIунни чявхълущалсса аьратталсса гъарал. Му гъарал цурдагу дия ттявха тIисса, лахъсса цIупар ришлашисса. ХIатта чявхълул муксса зарал биян къабарчагу, яла кIул хьуна Вихьуллал шяраваллил хьхьичIсса арнил МурцIувалу тIисса кIанттай урчIва гъаттара, паранну дагьну, ливтIушиву.
МурцIувалу тIисса кIанттаяту арх дакъа, Хъювхъиял шяравун нанисса бахьттаххуллия ларайну, дуссар ца метIралул утташиврийсса ва ххюра-ряхра метIралул куртIшиврийсса кIаланг, паранну дагьну хьуссар тIисса. Амма паранну шиккун та дагьссарив кIулну бакъар.
Ва цава. КIилчин, вай гъаттарайн паранну дагьсса кIанттай, кIицI дурсса кIаланграйн къаршину, тIиртIуну дур ххуллурдайн бичайсса ххюл ласайсса карьер. КIицI бувсса ишру хIисавравун лавсъсса чIумал, щак багьлай бур ва паранну дагьсса кIанттай лухччинуву муххал мяъдан бикIан бюхъайхха тIисса. Минна ми муххал духьунссар параннугу кIункIу дуллай. Ххюл ласайсса карьерданулгу гайннучIансса манзил кутIа бувну бикIан бюхъай.
Шиккува бур хIасул хъанай ца цамургу зат.
Жула инсантал, гъаттарахIухчин гай ябуллан арцу дулун къаччай, гъаттара итабакьлай бур ччи-ччинийх. Му чIумал ми бакъа хъанай бур, цайми балардахьхьун бириллай бур. Ва иширая бавсса инсантал бия хIухчу чIарав ивкIссания, параннарая буруччин къахьурчагу, чапур къахьун бихханвагу хьунссия тIий. Чув яхъанай ухьурчагу, инсаннан аьркинссар жяматрал низамирайн мютIину оьрму бутлан.
