Июльданул 28-нний – Аьрасатнал Аьралий-Хьхьирил Флотрал кьини, Цалчинмур каналданий «Доброе утро» передачалий ккаккан дурунни цалчинмур ранграл капитан, аьралий бутIрал ветеран, МахIачкъала шагьрулул аьралий комиссар, КIундиннал шяравасса Геннадий Кьурбановлул кулпатраясса сюжет. Ванил хIакъираву чIиви-хъунсса ихтилат буварду Геннадий Кьурбановлул кулпат Пат1имат Кьурбановащал.

Ванин щиннияргу хъинну кIулссар ва Флотрайсса къуллугърая. Ва къуллугърай Геннадий Шихаьлиевичлул гьан дурсса 35-нния лирчусса шиннардива 26 шинай ванащал хъачI-хъачIрай дирхьуну къуллугъ буллай бивкIссар Пат1иматгу. Ванил дур «главный старшина» тIисса аьралий цIа. 1988-ку шиная 2014-ку шинайн бияннин Пат1имат къуллугъ буллай бивкIссар ВМФ-рал Ухссавнил флотрал личIи-личIисса аьра­лий бутIраву, строевой бутIлуву – делопроизводительну. Аьралий пенсиялийн бувккун махъ Архангельскаллал областьрайсса Северодвинск шагьрулул военкоматрайгу зий бивкIссар.
– Цалчинмур каналданул бригада бувкIуна жучIан. Аьра­сатнал Аьралий-Хьхьирил Флотрал кьини жул кулпатран хъуннасса агьамшиву дусса кьинир, жул кулпатрал оьрму цимигу шинай ва къуллугърацIун бавхIуну бивкIссар. На 18 шинаву, щар хьуну, лавгра жулва билаятрал ухссавнийн, вания тинмайсса ттул оьрмугу цимигу шинай бавхIуну бия аьралий-хьхьирил къуллугърацIун. Ттул диялсса шинну ларгунни ласнащал аьралий гарнизоннай. ХIаписарнал кулпатну бушиву – му пишари, лас гьарца кьини даврийн, командировкалийн тIайла укки, кьарал дакъасса зузи кьинирду, шану бакъасса хьхьурду, бигьалагай кьинирду дакъасса къуллугъ… Ца кIанайн дахьва аьдат хьуну, кIанттул хьуннин, бачин багьайва цамур кIанайн, жулла думургу дартIун, мюрщисса оьрчIащал. ХIаписарнал кулпатшиву хъинну захIматссар, ялун бурувгун гьарзат дюрчIуну, ххуйну чIаларчангу. Ухссавний, гъан-маччаминная архну, тIабиаьтрал захIматсса шартIругу, цаму-цамургу бувхIуну. БакIрайва тих жулва ватанлувтал къабикIайва, махъ бувкIуна, вания тиннай ялагу ва чулуха цахъис бигьашиву, рахIатшиву хьуна. Шиннардивун дакI буттал кIанайн, ватандалийн хъиннура кIункIу тIун диркIуна. Пикри бувссия тарихийсса ватандалийн бизан, хIатта архну бунугу, тачIаввагу шихаллия ят бувцун къабивкIнугу, – буслай бур Пат1имат.
Мяйжаннугу, Геннадий Шихаьлиевичлуя эбрат ларсун, ванал ххуллу ккаккан бувну, КIундиннал шяравасса цимиягу жагьилнал цалва оьрмурду бавхIуссар хьхьирил къуллугърацIун.
Геннадий Кьурбанов къуллугъ буллай ивкIссар Ухссавнил Флотрай, Мурманскаллал областьрайсса Ведяево поселокрай, подводный лодкалий. ИвкIссар командирнал кIилчинма хъиривчуну, Ухссавнил Флотрал атомный ракетардал жамирдал 9-мур эскадралул штабрал начальникнал хъунама кумагчину, Ведяевский райондалийсса базированиялул штабрал начальникнал хъиривчуну ва цаймигу къуллугъирттай.
Цуксса цIакьсса, цуксса хьхьичIунсса унугу адамина, ванал цIакьсса мюхчансса къинтта – кулпат, бикIан аьркинссар, гьамин, вана укунсса кулпатнугур хъанахъисса Пат1имат.
Геннадийл ва Пат1иматлул бур 3 оьрчI, оьрчIал оьрчIру.
Барча тIий Кьурбановхъал кулпатрахь Аьралий-Хьхьирил Флотрал кьини, чIа тIий буру гьарца дуллалимуниву тIайлабацIу, кулпатраву нахIушиву ва чIярусса ххаришивуртту.
Бадрижамал Аьлиева